QAN YADDAŞI
20 Yanvar Azərbaycan xalqının ucalıq və qəhrəmanlıq günüdür
Kiyev, 20 yanvar (AZƏRTAC). Bu gün Kiyevdə, ölkə paytaxtının mərkəzində yerləşən “Ukrayna” mehmanxanasının konfrans zalında 20 Yanvar şəhidlərinin xatirə gecəsi keçirilmişdir. Tədbir Ukrayna Azərbaycanlıları Konqresi (UAK) tərəfindən təşkil olunmuşdur.
Salonda matəm lentlərinə bükülmüş al qərənfillər, divarlarda hərbi geyimli cəlladların və onların kommunist havadarlarının müdhiş cinayətini əks etdirən fotoşəkillər, masalarda yanvar faciəsindən bəhs edən press-relizlər vardı.
Xatirə gecəsini giriş sözü ilə Azərbaycanın Ukraynadakı səfiri Eynulla Mədətli açmışdır. O, diplomatik heyət və öz adından toplaşanlara dərin hüznlə başsağlığı vermiş, Qanlı Yanvar hadisəsindən bəhs etmiş, bu faciənin başlıca müqəssirlərinin Qorbaçov və onun əlaltıları olduğunu bildirmişdir. Sonda səfir həmvətənlərini 20 Yanvar şəhidlərinin xatirəsini əziz tutmağa, ölkəmizin azadlığı və suverenliyi naminə həyatlarını qurban vermiş Vətənin qəhrəman oğul və qızlarının müqəddəs işini davam etdirməyə - müstəqil, azad və çiçəklənən Azərbaycan qurmağa çağırmışdır.
O, həmçinin tədbir iştirakçılarını əmin edərək demişdir: “Biz, şübhəsiz, Dağlıq Qarabağı və zəbt edilmiş bütün ərazilərimizi işğaldan azad edəcəyik”.
Sonra Lider TV-nin çəkdiyi “Qanlı Yanvar” sənədli filmi göstərilmişdir.
Qanı donduran sənədli kadrlara baxdıqdan sonra UAK-ın lideri Rövşən Tağıyev, Ukraynadakı diasporumuzun Ağsaqqallar Şurasının rəhbəri Firidun Məmmədov, Hacı Vilayət (Quliyev), Ukraynadakı Azərbaycanlı Gənclər İttifaqının sədri Anar Tahirov, Ukrayna Linqvistika İnstitutunda Bakı Slavyan Universitetinin açdığı Azərbaycan Dili və Ədəbiyyatı Mərkəzinin rəhbəri professor Rafiq Novruzov, Hacı Əbülfəz (Qasımov) Bakı faciəsinin günahkarlarını məsuliyyətə cəlb etməyə çağırmışlar.
Ukraynanın yəhudi cəmiyyətinin prezidenti Arkadi Monastırski azadlıqsevər Azərbaycan xalqının oğul və qızlarının böyük hünər göstərdiklərini qeyd edərək bildirmişdir ki, 20 Yanvar 27 Yanvarla - dünya birliyinin elan etdiyi Holokost günü ilə səsləşir. O, həmçinin dərin razılıq hissi ilə bildirmişdir ki, onun tarixi vətəni olan İsrail dövlətinin Azərbaycan Respublikası ilə gözəl münasibətləri vardır.
Krım və Ukrayna Tatarları və Başqırdları Federasiyasının nümayəndəsi Zinura Teluxina 20 Yanvar şəhidlərinin xatirəsini yad etmiş, onların qəhrəmanlığı haqqında xeyli səmimi söz demişdir. O, Bakı faciəsi haqqında dəhşətli xəbəri Başqırdıstanda yaşadığı zaman eşitmişdi. O, toplaşanlara rəfiqəsinin bu sözlərini çatdırdı: “Əgər biz uşaq olmasaydıq, Moskvaya uçub Qorbaçovu güllələyərdik!”
Sonda Zinura xanım Azərbaycan xalqını 23 il bundan əvvəl göstərdiyi hünərinə görə böyük xalq adlandırmışdır.
Tədbirdə Azərbaycan səfirliyinin əməkdaşları, UAK-ın fəalları və üzvləri, dini rəhbərlər, milli-mədəni mərkəzlərin nümayəndələri, Kiyevin ali məktəblərində təhsil alan azərbaycanlı tələbələr, Azərbaycan və Ukrayna KİV-lərinin nümayəndələri iştirak etmişlər.
Şəhidlərin xatirə gecəsinin təşkilatçıları aparıcı “İnter” televiziya kanalına və Ukrayna, ingilis və rus dillərində nəşr olunan nüfuzlu “Den” qəzetinə eksklüziv müsahibələr vermişlər.
Zeynal Ağazadə
AZƏRTAC-ın xüsusi müxbiri
Kiyev