Zəfər Günü və Fikrət Əmirovun yubileyi Avstriyada təntənəli şəkildə qeyd olunub VİDEO
Zalsburq, 9 noyabr, AZƏRTAC
Zəfər Günü münasibətilə Avstriyanın Zalsburq şəhərində yerləşən Motsarteum Fondunun Böyük Zalında təntənəli konsert proqramı və rəsmi qəbul təşkil olunub. Avstriyada klassik musiqi mərkəzlərindən biri olan və dahi Volfqanq Amadeus Motsartın doğulduğu Zalsburqda bəstəkarın adını daşıyan fondda ilk dəfə Azərbaycan klassik əsərləri səsləndirilib.
AZƏRTAC xəbər verir ki, Azərbaycanın Avstriyadakı səfirliyinin təşkilatçılığı ilə baş tutan tədbirdə Zalsburqda fəaliyyət göstərən konsulluqların təmsilçiləri, hökumət nümayəndələri, yerli ictimaiyyətin və Azərbaycan icmasının üzvləri iştirak ediblər.
Azərbaycanın Avstriyadakı səfiri Rövşən Sadıqbəyli açılış nitqində cari ildə bir sıra əlamətdar yubileylərin qeyd olunduğunu diqqətə çatdırıb. Bildirib ki, bu il Azərbaycan və Avstriya arasında diplomatik əlaqələrin qurulmasının 30 illiyi tamam olur, lakin iki ölkə arasında əlaqələrin tarixi daha qədimlərə gedib çıxır. Belə ki, hələ 1473-cü ildə Azərbaycan Ağqoyunlu dövlətinin hökmdarı Uzun Həsən və Müqəddəs Roma İmperiyasının avstriyalı kayzeri III Fridrix arasında diplomatik yazışmalar və qarşılıqlı elçi səfərləri baş verib.
Diqqətə çatdırılıb ki, Azərbaycan Respublikasının Prezidenti İlham Əliyevin müvafiq Sərəncamı ilə bu il həm ölkəmizdə, həm də ölkə hüdudlarından kənarda Şuşa şəhərinin 270 illik yubileyi və bu münasibətlə “Şuşa İli” geniş qeyd edilir. “Azərbaycan musiqisinin məbədi” adlandırılan Şuşa şəhəri və ümumilikdə Qarabağ regionu Azərbaycan mədəniyyətinə görkəmli şəxsiyyətlər bəxş edib, həmin şəxslər Azərbaycan ədəbiyyatı, ictimai fikir və mədəniyyətinin inkişafına təkan veriblər. Onların sırasında bu il 100 illik yubileyi qeyd edilən bəstəkar Fikrət Əmirovun xüsusi yeri var. Öz ölməz əsərləri ilə Azərbaycan və dünya musiqisi üçün sanballı irs yaradan F.Əmirovun əsərlərində Azərbaycan xalq musiqisi və milli melodiyalar ön planda dayanır. F.Əmirov Avropa klassik musiqi ənənələrinin Azərbaycan milli musiqi və muğam sənəti ilə sintezini özündə ehtiva edən simfonik muğam janrının banisidir. Azərbaycan mədəniyyəti tarixində özünəməxsus izlər qoymuş dahi şəxsiyyətlər - Üzeyir Hacibəyli, Niyazi, Bülbül, Cabbar Qaryağdıoğlu və digərləri kimi Fikrət Əmirov da Azərbaycan mədəniyyətinin incisi Şuşa şəhərində dünyaya göz açmışdır.
Səfir diqqətə çatdırıb ki, bu gün bütün dünyada azərbaycanlılar Şuşanın 28 illik işğaldan sonra azad edildiyi 8 Noyabr - Zəfər Gününü fəxrlə bayram edir, Vətən torpaqlarının işğaldan azad olunması üçün canını fəda etmiş igid oğullarımızın xatirəsini minnətdarlıqla anır. Diqqətə çatdırılıb ki, 2023-cü ildə Beynəlxalq Türk Mədəniyyəti Təşkilatı (TÜRKSOY) tərəfindən Şuşa şəhəri türk dünyasının mədəniyyət paytaxtı elan edilib, davamlı sülhün, inkişafın və tərəqqinin təmin edilməsini hədəf götürən Azərbaycan Şuşanı və ümumilikdə Qarabağ regionunu sülh və əmin-amanlıq hökm sürən məkana çevirəcəkdir.
Tədbirdə çıxış edən Azərbaycan Respublikasının Diasporla İş üzrə Dövlət Komitəsinin sədri Fuad Muradov Azərbaycan Prezidenti İlham Əliyevin Sərəncamı ilə Şuşa şəhərinin Azərbaycanın mədəniyyət paytaxtı elan edildiyini diqqətə çatdırıb. Şuşanın Azərbaycanın tarixi, mədəni, ictimai-siyasi həyatında mühüm mərkəzlərindən biri olduğunu qeyd edən Komitə sədri şəhərin əsasının Azərbaycanın Qarabağ xanlığının xanı Pənahəli xan tərəfindən qoyulduğunu bildirib. Azərbaycan maddi-mədəni irsinin inkişafında xüsusi çəkisi olan Şuşa şəhərində toxunmuş xalçalar hələ 1867-ci ildə Parisdə beynəlxalq sərgidə mükafata layiq görülüb.
Komitə sədri diqqətə çatdırıb ki, Avstriyanın mühüm mədəni mərkəzlərindən biri olan Zalsburq şəhərində Azərbaycan Evi fəaliyyət göstərir və iki ölkə arasında mədəni və dostluq əlaqələrinin inkişafı, eləcə də soydaşlarımızın sıx birləşməsi istiqamətində müntəzəm işlər aparılır.
Tədbirin bədii hissəsində tanınmış dirijor, professor, Xalq artisti, Əməkdar incəsənət xadimi Yalçın Adıgözəlovun dirijorluğu ilə Zalsburq Simfonik Orkestri Azərbaycan və Avstriya bəstəkarlarının əsərlərindən ibarət konsert proqramı ilə çıxış edib. Əlamətdar məqamlardan biri ondan ibarət olub ki, Y.Adıgözəlovun timsalında ilk azərbaycanlı dirijor məşhur Motsarteum Fondunun Böyük Zalında konsertə rəhbərlik edib. Konsertdə Üzeyir Hacıbəyli, Fikrət Əmirov, Qara Qarayev və digər Azərbaycan bəstəkarlarının əsərləri böyük maraqla qarşılanıb. Konsertin V.A.Motsartın məşhur əsərlərindən birinin uvertürası ilə başlaması və bəstəkar Vasif Adıgözəlovun “Qarabağ şikəstəsi“ ilə kulminasiya nöqtəsinə çatması simvolik məna daşıyıb. Hər iki ölkədə musiqi ənənələrinin dərinliyi və özünəməxsusluğunu bir daha nümayiş etdirib. Solistlər Orxan Cəlilov (bariton), Mirələm Mirələmovun (xanəndə) və Fərid Feyzullayevin (skripka) ifaları sürəkli alqışlara səbəb olub.
Konsert proqramından sonra qonaqlara ziyafət verilib.
Elgün Niftəli
AZƏRTAC-ın xüsusi müxbiri
Zalsburq
Bölmənin digər xəbərləri
