24 aprel - Beynəlxalq İKT-də Qızlar Günü
Bakı, 24 aprel, AZƏRTAC
Bütün dünya ictimaiyyəti kimi Azərbaycanda da aprelin sonuncu həftəsinin dördüncü günü İKT-də Qızlar Günü (“Girls in ICT Day”) kimi qeyd edilir.
AZƏRTAC xəbər verir ki, bu gün Birləşmiş Millətlər Təşkilatının (BMT) informasiya və kommunikasiya texnologiyaları (İKT) sahəsində ixtisaslaşmış qurumu olan Beynəlxalq Telekommunikasiya İttifaqı (BTİ) tərəfindən təsis edilib.
Bu il Beynəlxalq İKT-də Qızlar Günü aprelin 24-də qeyd olunacaq və “İnklüziv rəqəmsal transformasiya üçün İKT-də qızlar” mövzusuna həsr olunub.
İKT-də Qızlar Gününün keçirilməsinin əsas məqsədi qızları informasiya-kommunikasiya texnologiyaları (İKT) sahəsinə cəlb etmək və onların bu sahədə fəaliyyətini dəstəkləməkdir.
İncəsənət və tarixdən başlayaraq hüquq, ibtidai təhsil və qrafik dizaynadək bütün karyera növlərində texnologiyanın mühüm rol oynaması ilə gənc yaşda texnoloji bacarıqların öyrədilməsi qızlara iqtisadi müstəqillik qazanmağa kömək edə bilər. Hazırda İKT sektorunun həmişəkindən daha çox qız və qadınlara ehtiyacı var.
Gələcəyin işləri texnologiya və innovasiya ilə idarə olunacaq. Bu gün ibtidai məktəbə daxil olan uşaqların 65 faizi gələcəkdə bugünkü gün mövcud olmayan işlərdə çalışacaq. Qızlar öyrənməyə həvəslidirlər, məsuliyyət götürürlər və texniki bacarıqlara yiyələnirlər və öz nümunələri ilə başqalarını ruhlandırırlar.
Dünyada daha çox qadının İKT sektoruna cəlb edilməsi üçün ciddi səylər göstərilsə də, hətta ən sivil ölkələrdə belə bu yolda bir sıra problemlər və maneələr mövcuddur. Bu sahədə çalışan qadınlar ümumi İKT əmək bazarının cəmi 26 faizini təşkil edir.
Bu gün ölkəmizdə də ənənəvi olaraq geniş qeyd olunur. Rəqəmsal İnkişaf və Nəqliyyat Nazirliyi tərəfindən gənc qızların texnologiya sahəsində maarifləndirilməsi, təhsilin əhəmiyyəti və bu sahədə geniş imkanlar barədə məlumatlandırılması, rəqəmsal dünyada fəal iştiraka cəlb edilməsi məqsədi ilə hər il Beynəlxalq İKT-də Qızlar Gününə həsr olunmuş tədbirlər təşkil olunur.
Azərbaycanın İKT sektorunda əldə etdiyi nailiyyətlər beynəlxalq təşkilatlar səviyyəsində də qeyd olunur.
Belə ki, Beynəlxalq Telekommunikasiya İttifaqının (BTİ) regional direktoru Nataliya Moçu “Onlayn Azərbaycan” layihəsinin bu il Bakıda baş tutan hesabat tədbirində bildirdi: “Azərbaycan informasiya-kommunikasiya texnologiyaları (İKT) sahəsində məlumatların toplanması sisteminin təkmilləşdirilməsi sahəsində mühüm nailiyyətlər əldə edib. 2022–2023-cü illərdə Azərbaycanın Rəqəmsal İnkişaf və Nəqliyyat Nazirliyi ilə əməkdaşlıq çərçivəsində məlumatların toplanması və ötürülməsi proseslərinin BMT-nin beynəlxalq tələblərinə uyğun təkmilləşdirilməsi istiqamətində işlər aparılıb. Ümid edirik ki, bu layihə vasitəsilə Azərbaycan daha da keyfiyyətli məlumat təqdim edəcək. Həmçinin ölkədə ən aktiv internet istifadəçiləri gənclərdir. Dünyada 15-24 yaşında insanların təxminən 79 faizi internetdən istifadə edir ki, bu da əhalinin qalan hissəsindən 13 faiz çoxdur. Azərbaycanda isə bu rəqəmlər daha yüksəkdir. İnternetdən istifadə edən gənclərin (15-24 yaş) payı 88,2 faiz, 25-74 yaşlı əhali arasında isə bu rəqəm 91,2 faizə çatır”, - deyə BTİ regional direktoru vurğulayıb.
Bütün dünyada olduğu kimi, Azərbaycanda da Beynəlxalq İKT-də Qızlar Günü bir sıra tədbirlərlə qeyd edilir.
Həmçinin Beynəlxalq İKT-də Qızlar Günü bu il ilk dəfə Müstəqil Dövlətlər Birliyi (MDB) ölkələrində və Ərəb Dövlətləri regionu ilə birgə qlobal səviyyədə keçiriləcək. Eləcə də Qırğızıstanın Bişkek və Mavritaniyanın Nuakşot şəhərləri arasında birbaşa əlaqə olan hibrid tədbir keçiriləcək. Tədbirdə dünyanın hər yerindən görkəmli ekspertlərin iştirakı ilə müzakirələr aparılacaq və qlobal auditoriyaya canlı yayımlanacaq.
Qeyd edək ki, İKT gender bərabərliyinin təmin edilməsində və qadınların səlahiyyətlərinin artırılmasında əsas amillərdən biridir. Bu texnologiyalardan istifadə etməklə qadınlar və qızlar yeni iş yerləri yaratmaq və sahibkarlığı inkişaf etdirmək imkanlarından yararlana bilərlər.
İKT-də Qızlar Günü qızları və gənc qadınları elm, texnologiya, mühəndislik və riyaziyyat (STEM) sahələrində təhsil və karyeralarını davam etdirməyə təşviq etməklə rəqəmsal uçurumun aradan qaldırılmasına kömək etmək üçün qlobal səydir.
Bölmənin digər xəbərləri
