Muxtar Babayev: İqlim tədbirləri ilə sosial müdafiə arasında kritik əlaqə var VİDEO
Bakı, 30 sentyabr, AZƏRTAC
İqlim tədbirləri ilə sosial müdafiə arasında kritik əlaqə mövcuddur. Həqiqətən də, iqlim tədbirləri yalnız emissiyaların azaldılması və ya texnologiyaların tətbiqi ilə məhdudlaşmır. Bu, əsasən, insanlarla, onların sağlamlığı, bacarıqları, təhsili, məşğulluğu və ləyaqəti ilə bağlıdır. Buna görə də COP29 çərçivəsində ilk dəfə İnsan İnkişafı Günü təşkil edildi və iqlim dayanıqlığı üçün insan inkişafı ilə bağlı ortaq təşəbbüs irəli sürüldü.
AZƏRTAC xəbər verir ki, bunu Azərbaycan Prezidentinin İqlim məsələləri üzrə nümayəndəsi, COP29-un Prezidenti Muxtar Babayev Bakı İqlim Fəaliyyəti Həftəsinin (BCAW 2025) ikinci günü çərçivəsində etdiyi çıxış zamanı bildirib.
O deyib ki, bu təşəbbüs uşaqlara və gənclərə fokuslanmaqla onları bir araya gətirməyə yönəlib: “Təşəbbüs çərçivəsində tam bir proqram paketi təqdim edildi və ilk növbədə insanları qlobal diqqət mərkəzinə gətirdi. Biz yüksəksəviyyəli rəhbərləri iqlim dəyişikliyinin insan inkişafına təsirini qiymətləndirmək üçün topladıq. Bu, təzyiq altında olan səhiyyə sistemindən, uşaqların təhsilə çıxışının məhdudlaşmasına, işçilərin qarşılaşdığı pozuntulara və yeni bacarıqlara ehtiyacına qədər geniş sahələri əhatə etdi. Eyni zamanda, təhsil, sağlamlıq, yaşıl iş yerləri və gənclərin işsizliyi mövzusunda tematik seminar təşkil etdik. Bu, beynəlxalq nümayəndələrə təcrübə mübadiləsi etmək və praktik həllər hazırlamaq imkanı verdi. İkinci olaraq, biz insan inkişafı üçün iqlim təşəbbüslərində yönəldici prinsiplər toplusunda razılığa gəlmək üçün hamını bir araya gətirdik. Bu prinsiplər gələcək illər üçün aydın istiqamət müəyyən edir. Onlar ölkələrdən iqlim tədbirlərini insan inkişafı ilə uyğunlaşdırmağı, təhsil, iş və sağlamlığı insan inkişafının əsas göstəricisi kimi tanımağı tələb edir. Bu, hökumətləri, işçiləri, həmkarlar ittifaqlarını, vətəndaş cəmiyyətini, akademiyanı, uşaqları və gəncləri ədalətli keçid aspektlərini müəyyən etmək üçün bir araya gətirməyin vacibliyini vurğulayır. Eyni zamanda, iqlim savadlılığı və təhsil sahəsinə daha çox sərmayə qoyulmasını, gənclərin yaşıl iqtisadiyyat və enerji keçidi üçün lazımi bilik və bacarıqlara sahib olmasını tələb edir. Nəhayət, təşəbbüs davamlılığı təmin etmək üçün yeni platformalar yaratdı. Ümumdünya Səhiyyə Təşkilatı ilə əməkdaşlıq çərçivəsində İqlim və Sağlamlıq üzrə Sənədli Ko-prezidentliyin Davamlılıq Koalisiyasını təsis etdik. Bu koalisiya sağlamlığın iqlim gündəliyində ön planda qalmasını təmin edəcək və sədrlik dövrlərimizdə əldə edilən tərəqqi gələcək sədrliklər üçün davam etdiriləcək”.
Muxtar Babayev diqqətə çatdırıb ki, açıq dialoq zamanı hamı razılaşıb ki, insan inkişafına sərmayə qoymaq iqlim baxımından ağıllı sərmayədir: “Buna görə də Əmək və Əhalinin Sosial Müdafiəsi Nazirliyi bizim işimizdə mühüm tərəfdaş olub. Onların rəhbərliyi göstərdi ki, sosial müdafiə, məşğulluq siyasəti və bacarıqların inkişafı iqlim dayanıqlığının əsas sütunlarıdır. Biz başladığımız təşəbbüsləri və tərəfdaşlıqları davam etdirməyi səbirsizliklə gözləyirik”.
Bölmənin digər xəbərləri
