Şəkidə sahibsiz itlər üçün sığınacaq yaradılacaq - müraciət olunub VİDEO
Şəki, 28 noyabr, Rasim İslamoğlu, AZƏRTAC
Şəhər mühitində sahibsiz heyvanların mövcudluğu illərdir ki, həm ictimai təhlükəsizlik, həm də heyvanların qorunması baxımından həssas və mübahisəli bir mövzu olaraq qalır. Qədim tarixi və füsunkar təbiəti ilə tanınan Şəki də bu problemdən kənarda deyil. Küçələrdə gəzən sahibsiz itlər bəzən sakinlərin narahatlığına səbəb olur. Hətta ötən günlərdə sahibsiz itlərin insanlara hücum etmələri də qeydə alınıb.
Şəkidə yaz-yay aylarından fərqli olaraq qışda sahibsiz küçə itləri daha çox müşahidə edilir. Məsələn, ötən həftə itlərin insanlara hücum etməsi ilə bağlı şimal-qərb bölgəsində bir neçə hadisə qeydə alınıb ki, bunun da ikisi Şəkidə baş verib. Sahibsiz itlərlə şəhərin əksər küçə və meydanlarında, park və xiyabanlarında qarşılaşmaq mümkündür.
AZƏRTAC-ın bölgə müxbiri sakinlərlə görüşüb, müvafiq qurumdan məsələyə münasibət öyrənməyə çalışıb.
Şəki Rayon Mərkəzi Xəstəxanasından verilən məlumata görə, 2025-ci ilin yanvar–oktyabr ayları ərzində it dişləməsi səbəbindən tibb müəssisəsinə 1017 nəfər müraciət edib. Onların hər birinə zəruri ilkin tibbi xidmət göstərilib və quduzluq əleyhinə peyvənd olunublar. Pasiyentlər ambulator müalicədən sonra evə buraxılıblar. Heç bir ağırlaşma halı və ölüm faktı qeydə alınmayıb.
Şəhər sakini Dünyaxanım Həmidli heyvansevər olduğunu deyir. Bildirir ki, sahibsiz heyvanlar üçün sığınacaq yaradılarsa, yaxşı olardı. Çünki xüsusən qış aylarında sahibsiz itlər küçələrdə yem axtarır, kiminsə əlində zənbil, ya ərzaq görəndə aqressivləşir. Onun sözlərinə görə, özü də dəfələrlə belə hallarla qarşılaşıb. “Tək çıxış yolu onlar üçün sığınacağın yaradılmasıdır. Mən öz təqaüdümdən vəsait ayırıb onlara yemək almağa da hazıram. İnanıram ki, mənim kimi onlarla sakin də bu təşəbbüsə qoşular”, - deyən yaşlı qadın bu məsələnin həlli üçün müvafiq qurumların tezliklə işə başlamasını, əhali arasında şəffaf yardım kampaniyalarının keçirilməsini də təklif edir.
Şəhərdə insanların sıx hərəkət etdiyi küçələrdən birinə gəlirik. Yaşlı qadın it sürüsünü göstərərək bildirir ki, oradan keçmək çox təhlükəlidir.
Bir müddət əvvəl it hücumuna məruz qalan Anar Əfəndiyevin sözlərinə görə, bəzən qısırlaşdırılan itlərin daha aqressiv olduğunu müşahidə edirlər. Anar ona hücum edən sahibsiz iti göstərərək deyir ki, bütün bunlara baxmayaraq, bu canlılara heç kəs zərər vermir. Şəhər sakini sahibsiz itlərin bir yerə toplanmasını, bir mərkəzdə saxlanmasını ən düzgün həll yolu hesab edir.
Şəki Şəhər İcra Hakimiyyəti başçısının şəhər üzrə nümayəndəsi Rasim Həsənov sahibsiz itlərlə bağlı məsələnin onların da gündəlik qayğılarından biri olduğunu bildirir. Onun sözlərinə görə, bu məsələ onların diqqət mərkəzindədir. Rasim Həsənov bu məqsədlə dövlət fondundan 1 hektar torpaq sahəsinin ayrılması üçün müvafiq qurumlara müraciət olunduğunu, hazırda sənədləşmə işlərinin davam etdiyini bildirib.
“Biz sığınacağın yaradılması üçün şəhər icra hakimiyyəti və iş adamlarının dəstəyi ilə bu işə başlamışıq. Bununla yanaşı, şəhər bələdiyyəsi sahibsiz küçə itlərinin toplanaraq vaksinasiya prosesinə cəlb edilməsi və birkalanmasını da həyata keçirir. Bundan başqa, insanlarla maarifləndirmə işləri aparır, mütəmadi olaraq şəhərin təmiz saxlanılmasını, zibillərin zibil qutularına atılmasını, çayların və şəhər ərazisinin təmiz saxlanılmasını da tövsiyə edirik” - deyə, R.Həsənov əlavə edir.
O qeyd edir ki, bu işdə sakinlərin də dəstəyinə, köməyinə ehtiyac var: “Əhali bu işdə maariflənməli, zibil və xörək əlavələrinin küçələrə atılmasının qarşısı alınmalıdır. Çünki sahibsiz itlər küçə və dalanlarda sakinlər tərəfindən qoyulan zibil torbalarında qida axtarırlar ki, bu da onların aqressivləşməsinin başlıca səbəblərindən biridir. Yaxşı olar ki, sakinlər şəhərimizi, yaşayış yerlərini təmiz saxlasınlar. O ki qaldı, sığınacağın yaradılmasına, bu işin də tezliklə başa çatacağına ümid edirik”.
Bölmənin digər xəbərləri
