Xoş ovqatlı şəhər sakinlərinin şirin arzuları... REPORTAJ VİDEO
Bakı, 20 mart, AZƏRTAC
Ənənələrin, süfrələrin və xoş arzuların bayramı — Novruzu qeyd edirik. Bu gün paytaxtın mərkəzi küçələrində xüsusi bir canlanma, bayram coşğusu hökm sürür. Doğmaları, yaxınları ilə küçələrə axışan vətəndaşların üzündəki təbəssüm bayram ovqatından xəbər verir. Gəlin, arzu, sevinc dolu qəlblərin səsini birlikdə dinləyək.
AZƏRTAC-ın müxbirləri bayram günündə paytaxt sakinləri ilə həmsöhbət olub.
Paytaxt sakini Gülər Abdullayeva bayram münasibətilə qurulan infrastruktur, yaradılan şərait üçün minnətdarlığını bildirib: "Çox şadam ki, paytaxtımızda belə gözəl yarmarka qurulub. Xalqımız bura gəlib əylənir. Hər şey çox əladır. Hər kəsi təbrik edirəm. Xalqımıza, dövlətimizə sülh əmin-amanlıq, bol-ruzi bərəkət arzulayıram. Hər zaman sevək, sevilək, xoşbəxt yaşayaq".
Paytaxt sakini Aynur Qədimova deyib: "Şəhərdə paytaxt sakinləri və qonaqların bayramı keçirmələri üçün hər cür şərait var. Hər kəsin əhvalı yüksəkdir. Novruz bayramı münasibətilə sizi təbrik edirəm. Xalqımıza, dövlətimizə firavanlıq, bol ruzi, əmin-amanlıq arzulayıram. Neçə belə gözəl bayramlara çıxaq".
Dostları ilə birlikdə şəhərdə bayramı qeyd edən Zümrüd Zeynalzadə burada əyləndiyini, xoş vaxt keçirdiyini qeyd edib: "Dostlarımla şəhərin mərkəzində bayramı qeyd etməyə gəlmişik. Çox gözəl keçir. Bütün Azərbaycan xalqının bayramını təbrik edirəm. Hər bir bayramın xeyirli-uğurlu keçməsini, ruzi-bərəkətli olmasını arzu edirəm".
Ən səmimi müsahibimiz olan 13 yaşlı Məhəmməd Qafarlı isə Novruz bayramını xüsusilə yemək və adət-ənənələrinə görə çox sevdiyini deyib: "Ən xoşladığım bayram Novruzdur. Yeməklər çox olur deyə xoşlayıram. Həm papaqatdı mərasimini, həm də tonqal qalayıb üstündən atlanmağı bəyənirəm. Papaqatdı zamanı müxtəlif şirniyyatlar, şəkərbura, paxlava qoyurlar. Hamınızı təbrik edirəm. Hər zaman gözəl bayramlar keçirək".
Balaca bahar qızı olduğunu deyən Hiranur Məmmədova isə xalqımızı şeirlə təbrik edib.
Bölmənin digər xəbərləri
