AzMİU-da beynəlxalq IT konfransı işə başlayıb VİDEO
Bakı, 22 aprel, AZƏRTAC
Azərbaycan Memarlıq və İnşaat Universitetində (AzMİU) “İnformasiya Texnologiyaları və Onların Tətbiqi üzrə 3-cü Beynəlxalq Konfrans” (ITTA 2026) öz işinə başlayıb.
AZƏRTAC xəbər verir ki, konfrans Elm və Təhsil Nazirliyi, AzMİU, nazirliyin Riyaziyyat İnstitutu, İnformasiya Texnologiyaları İnstitutu, eləcə də ABŞ, Polşa, Türkiyə, Ukrayna, Qazaxıstan və Yunanıstanın ali təhsil və elmi-tədqiqat müəssisələrinin birgə təşkilatçılığı ilə keçirilir.
Konfransın əsas məqsədi elmi-tədqiqat müəssisələri, universitetlər, beynəlxalq təşkilatlar, dövlət və özəl sektoru təmsil edən mütəxəssisləri bir araya gətirərək informasiya texnologiyaları sahəsində mövcud elmi-praktik çağırışların, innovativ həllərin və gələcək inkişaf istiqamətlərinin müzakirə edilməsidir.
Beynəlxalq tədbirdə dünyanın müxtəlif ölkələrindən 210-dan çox alim və tədqiqatçının oflayn və onlayn formatda iştirakı nəzərdə tutulur. Konfrans çərçivəsində tikinti və memarlıqda informasiya texnologiyalarının tətbiqi, “ağıllı bina”, “ağıllı kənd” və “ağıllı şəhər” modelləri, eləcə də süni intellektin müxtəlif sahələrdə tətbiqi ilə bağlı mövzular diqqət mərkəzindədir.
Konfransın açılış mərasimində AzMİU-nun rektoru professor Gülçöhrə Məmmədova bildirib ki, müasir dövrdə informasiya-kommunikasiya texnologiyalarının memarlıq və inşaat sahəsinə inteqrasiyası şəhərsalma siyasətində yeni yanaşmalar formalaşdırır.
Onun sözlərinə görə, bu proses layihələndirmə, təhlükəsizlik, enerji səmərəliliyi və dayanıqlılıq baxımından geniş imkanlar yaradır: “Rəqəmsal modelləşdirmə, BIM texnologiyaları, “ağıllı şəhər” həlləri və avtomatlaşdırılmış idarəetmə sistemləri gələcəyin şəhərlərinin qurulmasında əsas rol oynayır. Azərbaycanda süni intellekt sahəsinin inkişafı dövlət səviyyəsində prioritet istiqamət kimi müəyyənləşdirilib. Bu məqsədlə AzMİU-da Süni İntellekt Mərkəzi yaradılıb, yeni layihələr, tədris proqramları və beynəlxalq əməkdaşlıqlar həyata keçirilir”.
Açılış mərasimində çıxış edən İnformasiya Texnologiyaları İnstitutunun baş direktoru, akademik Rasim Əliquliyev, Bakı Dövlət Universitetinin professoru Misir Mərdanov, Riyaziyyat İnstitutunun direktor müavini Elxan Sabziyev və AMEA-nın müşaviri, professor Telman Əliyev informasiya texnologiyalarının inkişafı və elmi əməkdaşlığın genişləndirilməsinin əhəmiyyətindən danışıblar.
Konfrans çərçivəsində Sedat Akleylek “Postkvant kriptoqrafik protokollar: nəzəriyyədən praktikaya” mövzusunda məruzə ilə çıxış edib. Məruzədə gələcəyin kibertəhlükəsizlik çağırışları, kvant hesablama dövründə məlumatların qorunması və yeni şifrələmə mexanizmləri barədə məlumat verilib.
Qeyd olunub ki, rəqəmsal transformasiya dövründə elm, təhsil və istehsalat arasında inteqrasiyanın gücləndirilməsi dayanıqlı inkişafın əsas şərtlərindən biridir.
Bölmənin digər xəbərləri
