İDMAN

Boks üzrə kişilərdən ibarət yığmamız dörddəbir finalda tam heyətlə təmsil olunacaq [YENİLƏNİB] VİDEO

21.06.2015 [21:46]
Çap et
A⁺ A^-

Azərbaycan boksçularından bu gün son olaraq rinqə çıxan Xaybula Musalov (75kq) da azarkeşlərə qələbə sevinci yaşadıb. Fransalı Kristian Mbilli Assomo-Halye ilə qarşılaşmadan qələbə (3:0) ilə ayrılan boksçumuz dörddəbir finalda iştirak etmək hüququ qazanıb.

Beləliklə, boks üzrə kişilərdən ibarət Azərbaycan yığması dörddəbir finalda tam heyətlə - 10 idmançı ilə təmsil olunacaq.

20:56

İkiqat Azərbaycan çempionu Kollazo Sotomayor “Bakı-2015”-də ikinci qələbəsini qazanıb. Dörddəbir final uğrunda döyüşdə moldovalı Dmitri Qalaqot ilə görüşə sürətli və kəskin hücumlarla başlayan təmsilçimiz birinci raundda rəqibini nokdaun vəziyyətinə salıb. Sonrakı raundlarda da üstünlüyünü davam etdirən K.Sotomayor 3:0 hesabı ilə qalib gələrək növbəti mərhələyə adlayıb.

17:34

Günün ikinci yarısı 60 kiloqram çəki dərəcəsində mübarizə aparan rusiyalı Zinaida Dobrinina və isveçrəli Sandra Brüggerin görüşü ilə start götürüb. Bu qarşılaşmanın qalibi dörddəbir finalda Azərbaycan idmançısı Yana Alekseyevanın rəqibi olacaq. Bu çəkidə digər görüşlər isveçli İda Lundblad ilə türkiyəli Qamze Başar və “Bakı-2015”-in beynəlxalq idman elçisi, irlandiyalı Keti Teylor ilə bolqarıstanlı Denitsa Eliseyeva arasında baş tutacaq.

Kişilərin mübarizəsində 64, 75 və 91 kiloqram çəki dərəcələrində 16 qarşılaşma keçiriləcək. Azərbaycan boksçularından Collazo Sotomayor (64 kq) moldovalı Dmitri Qalaqot, Xaybulla Musalov (75 kq) isə fransız Kristian Mbilli Assomo-Halye ilə görüşəcək.

Axşam saatlarında kişi və qadın boksçularının yarışlarında dörd çəki dərəcəsində ümumilikdə 19 görüş keçiriləcək.

17:34

Boks yarışlarının günün ilk yarısının görüşlərinə yekun vurulub. Səkkizdəbir final mərhələsində 60 kiloqram çəki dərəcəsində qadın, 69, 75 və 91 kiloqram çəki dərəcələrində kişi boksçular rinqə çıxıblar.

Boksçularımızdan ilk olaraq mübarizəyə 60 kiloqram çəki dərəcəsində çıxış edən Yana Alekseyevna qoşulub. Finlandiyalı rəqibi Mira Potkonenə 3:0 hesabı ilə qalib gələn boksçumuz dörddəbir finala vəsiqə qazanıb. Bu mərhələdə o, rusiyalı Zinaida Dobrinina və isveçrəli Sandra Brügger görüşünün qalibi ilə qarşılaşacaq.

Kişi boksçularımıza gəlincə, gənclər arasında Avropa çempionu, “Neftçi” İdman Sağlamlıq Mərkəzinin üzvü Pərviz Bağırov (69 kq) moldovalı Vasili Belousu, Abdulqadir Abdullayev (91 kq) isə macarıstanlı Adam Hamorini mübarizədən kənarlaşdırıb. Hər iki görüş təmsilçilərimizin 3:0 hesablı qələbəsi ilə yekunlaşıb.

Günün birinci yarısında qadın və kişi boksçuların mübarizəsində ümumilikdə 16 görüş keçirilib. Qadınların mübarizəsində Fransa, İtaliya, Almaniya, Serbiya, kişilərdə isə Böyük Britaniya, Almaniya, İtaliya, Rusiya (2 idmançı), Sloveniya, İrlandiya və Fransa təmsilçiləri növbəti mərhələyə yüksəliblər.

16:08

Kişi boksçularımız azarkeşlərini sevindirməkdə davam edirlər. Yarışda 91 kiloqram çəki dərəcəsində çıxış edən Abdulqadir Abdullayev də bu ənənəni pozmayıb. O, macarıstanlı rəqibi Adam Hamoriyə 3:0 hesabı ilə qalib gələrək dörddəbir finala çıxıb.

Beləliklə, bu günədək rinqə çıxan yeddi boksçumuzun hamısı dörddəbir finala vəsiqə qazanıb. Salman Əlizadə isə yarışa birbaşa bu mərhələdən başlayacaq.

15:11

Kişi boksçularımızdan daha biri dörddəbir finala yüksəlib. Bu dəfə gənclər arasında Avropa çempionu, “Neftçi” İdman Sağlamlıq Mərkəzinin üzvü Pərviz Bağırov (69 kq) rəqibi moldovalı Vasili Belousa heç bir şans verməyib -3:0.

14:25

Boks yarışlarında 60 kiloqram çəki dərəcəsində mübarizə aparan Azərbaycanın qadın boksçusu Yana Alekseyevna “Bakı-2015”-də ilk görüşünü səkkizdəbir finalda finlandiyalı Mira Potkonenə qarşı keçirib. Rəqibini 3:0 hesabı ilə məğlub edən idmançımız dörddəbir finala vəsiqə qazanıb.

Boksçumuzun görüşünü Azərbaycan Boks Federasiyasının prezidenti Kəmaləddin Heydərov və digər rəsmi şəxslər tribunadan izləyiblər.

14:17

"Bakı-2015" birinci Avropa Oyunları çərçivəsində keçirilən boks yarışlarında səkkizdəbir final mərhələsinin görüşləri davam edir. Bu gün "Baku Crystall Hall" rinqinə Azərbaycanın daha 5 boksçusu çıxacaq.

İlk olaraq qələbə uğrunda mübarizəyə 60 kiloqram çəki dərəcəsində Yana Alekseyeva qoşulacaq. Yarışda onun ilk rəqibi finlandiyalı Ale Mira Potkonen olacaq.

Daha sonra 69 kiloqram çəkidə boksçular qarşılaşacaqlar. Onlar arasında Azərbaycanın idman şərəfini Pərviz Bağırov qoruyacaq. Təmsilçimiz bir qədər sonra moldovalı idmançı Vasili Belousla qarşılaşacaq.

Günün birinci yarısının son döyüşləri ağır çəkili dəri əlcək ustaları arasında keçiriləcək. Boksçumuz Abdulqadir Abdullayev saat 15:30-da Macarıstan təmsilçisi Adam Hamori ilə döyüşəcək.

Azərbaycan idmançısı Collazo Sotomayor isə rinqə saat 20:30-da çıxacaq. C.Sotomayorun ilk Avropa Oyunlarında ikinci rəqibi Moldova boksçusu Dmitri Qalaqot olacaq.

Bu gün təmsilçilərimizdən son olaraq mübarizəyə Xaybula Musalov qoşulacaq. O, saat 21:00-da fransalı rəqibi Kristian Mbillin ilə görüşəcək.

13:52

Bakı, 21 iyun, A.Yadigarov, S.Allahverdiyeva, AZƏRTAC

“Baku Crystal Hall”da “Bakı-2015” birinci Avropa Oyunlarının boks yarışlarının altıncı gününə qadın idmançıların mübarizəsi ilə start verilib.

AZƏRTAC xəbər verir ki, günün birinci yarısında səkkizdəbir final mərhələsində 60 kiloqram çəki dərəcəsində qadın, 69, 75 və 91 kiloqram çəki dərəcələrində isə kişi boksçular rinqə çıxacaqlar. Azərbaycanın qadın boksçusu Yana Alekseyevnanın rəqibi finlandiyalı Mira Potkonen olacaq.

Kişi boksçularımıza gəlincə, gənclər arasında Avropa çempionu, “Neftçi” İdman Sağlamlıq Mərkəzinin (İSM) üzvü Pərviz Bağırov (69 kq) moldovalı Vasili Belous, digər idmançımız Abdulqadir Abdullayev (91 kq) macarıstanlı Adam Hamori ilə qarşılaşacaq.

Günün birinci yarısında qadın və kişi boksçuların mübarizəsində dörd çəki dərəcəsində ümumilikdə 16 görüş keçiriləcək.