Akademik Mehdi Mehdizadənin 110 illik yubileyinə həsr olunmuş elmi-praktiki konfrans keçirilmişdir
Bakı, 18 yanvar (AZƏRTAC). Yanvarın 17-də Bakı Pedaqoji Kadrların İxtisasartırma və Yenidənhazırlanma İnstitutunda (BPKİYİ) Azərbaycan Respublikası Təhsil Şurası ilə birgə görkəmli təhsil qurucusu və təşkilatçısı akademik Mehdi Mehdizadənin 110 illik yubileyinə həsr olunmuş elmi-praktiki konfrans keçirilmişdir.
BPKİYİ-dən AZƏRTAC-a bildirmişlər ki, konfransdan əvvəl qonaqlar burada 2012-ci ildə yaradılmış Heydər Əliyev muzey-lektoriyası ilə tanış olmuşlar. Tədbirdə institutun rektoru, professor Asəf Zamanov görkəmli alimin həyatı, fəaliyyəti və elmi yaradıcılığı barədə geniş məlumat vermişdir. Akademik Mehdi Mehdizadə görkəmli alim olmaqla yanaşı, əsl ziyalı kimi Vətəninə, millətinə sadiq, haqq yolunda əyilməz və mətin bir vətəndaş, əqidəsinə, amalına xidmət edən kamil bir insan idi. Onun həyatı iyirminci yüzilliyin tam 80 ilini əhatə edir. Bu illər ərzində M.Mehdizadə bir neçə siyasi quruluş, iqtisadi münasibətlər, müxtəlif baxışlar, ideologiya, fərqli tələb və vəzifələrlə qarşılaşmışdı.
Rektor qeyd etmişdir ki, Maarif Nazirliyinə rəhbərlik etdiyi 25 ilə yaxın bir müddətdə M.Mehdizadə xalq maarifinin fəal təşkilatçısı olmaqla yanaşı, geniş diapazonlu pedaqoq alim kimi də tükənməz yaradıcılıq axtarışlarını davam etdirmişdir. Həmin dövrdə o, yeni məktəblərin açılması, onların müasir avadanlıqla təchizi, təlim-tərbiyə prosesinin elmi əsaslarla təşkili, respublikamızda intellektual potensialın formalaşdırılması sahəsində çox böyük işlər görmüşdür. Yüksək mədəniyyət sahibi, nitqi, davranışı, ətrafındakılara münasibətilə seçilən M.Mehdizadə təkcə alim kimi deyil, bir insan kimi də akademik idi. Bir sıra dəyərli monoqrafiyaların müəllifi olan akademik M.Mehdizadə nəinki respublikamızda və keçmiş SSRİ-də, eyni zamanda, UNESCO-nun konfrans, müşavirə və iclaslarındakı məruzə və çıxışları, habelə alman, ingilis, fransız, ispan, ərəb və s. dillərdə çap olunmuş məqalələri ilə beynəlxalq aləmdə də böyük nüfuz qazanmışdır. Adi kənd müəllimliyindən başlayan pedaqoji fəaliyyət onu nazir vəzifəsinə, akademik zirvəsinədək yüksəltmişdir. Əminəm ki, keçmiş SSRİ maarif naziri, akademik M.Prokofyevin “akademik M.Mehdizadə pedaqogika elminin korifeylərindən biri, maarif quruculuğunun görkəmli təşkilatçısı kimi tanınmışdır” fikri əbəs yerə yaranmamışdır.
Natiq çıxışında onu da vurğulamışdır ki, akademik M.Mehdizadənin mənalı ömür yolu, həyatı və elmi-pedaqoji, ictimai fəaliyyəti həmişə diqqət mərkəzində olmuşdur. Təsadüfi deyil ki, təhsil naziri, professor Misir Mərdanovun layihəsi əsasında hazırlanmış və 2010-cu ildə nəfis şəkildə çap olunmuş “Azərbaycanın təhsil nazirləri” kitabının “Azərbaycan xalq maarifi nazirləri” bölməsində Mehdi Mehdizadənin ömür yolu, elmi-pedaqoji və ictimai fəaliyyəti haqqında konkret faktlar dərc olunmuşdur.
Ümummilli lider Heydər Əliyevin elmə, təhsilə diqqət və qayğısı akademik M.Mehdizadədən də yan keçməmişdir. Ulu öndər hər zaman görkəmli alimin elmi fəaliyyətini və təşkilatçılıq bacarığını yüksək qiymətləndirmişdir. Akademik M.Mehdizadənin pedaqogika elminin, pedaqoq alimlərin inkişafında, formalaşmasında böyük zəhməti və mühüm rolu olmuşdur. Bu gün M.Mehdizadənin yetirmələri təkcə respublikamızda deyil, həmçinin xarici ölkələrdə Vətənimizi layiqincə təmsil edib, elmimizi inkişaf etdirirlər.
Sonra Mehdi Mehdizadənin ömür yoluna həsr edilmiş sənədli film nümayiş etdirilmişdir.
Konfransda Təhsil Şurasının sədri professor Əjdər Ağayev “Akademik Mehdi Mehdizadə - görkəmli təhsil təşkilatçısı”, Təhsil Problemləri İnstitutunun şöbə müdiri, professor Vidadi Xəlilov “Akademik Mehdi Mehdizadənin pedaqoji irsində müasirlik tendensiyaları” mövzusunda məruzə etmişlər. Təhsil Problemləri İnstitutunun direktoru, professor Abdulla Mehrabov, həmin institutun direktor müavini, professor Yəhya Kərimov, “Azərbaycan məktəbi” jurnalının baş redaktoru, filologiya elmləri namizədi Nəcəf Nəcəfov, Təhsil Muzeyi direktorunun müavini Arif Muradov və digərləri M.Mehdizadə ilə bağlı maraqlı xatirələrini söyləmişlər.
Sonda Mehdi Mehdizadənin övladları, pedaqoji elmlər namizədi Zemfira Mehdizadə və Nailə Mehdizadə onun təkcə dəyərli alim, görkəmli maarif qurucusu kimi deyil, həm də bir ata kimi mənəvi zənginliyə malik olduğundan danışmış, elmi-praktiki konfransın təşkilatçılarına minnətdarlıqlarını bildirmişlər.
Bölmənin digər xəbərləri
