REGİONLAR
Bölgələrdə ümummilli lider Heydər Əliyevin əziz xatirəsi ehtiramla yad olunub
Ağsu, 12 dekabr, AZƏRTAC
Ağsuda ulu öndər Heydər Əliyevin vəfatının 14-cü ildönümü ictimaiyyətin çoxsaylı nümayəndələrinin iştirakı ilə ehtiramla yad edilib.
AZƏRTAC-ın bölgə müxbiri xəbər verir ki, dekabrın 12-də səhər saatlarında rayon rəhbərliyi, idarə, müəssisə və təşkilatların nümayəndələri, o cümlədən ziyalılar, ağsaqqallar və gənclər şəhərin mərkəzindəki Heydər Əliyevin adını daşıyan parka gələrək burada böyük öndərin abidəsini ziyarət edib, önünə əklil və qərənfillər qoyub, Ümummilli Liderə öz ehtiramlarını bildiriblər.
Sonra Heydər Əliyev Mərkəzində toplantı keçirilib. Məktəblilər Ulu Öndərə, Azərbaycana həsr olunan şeirlər söyləyiblər. İştirakçılar dahi rəhbərin həyat və fəaliyyətindən bəhs edən filmə baxıblar.
Toplantını giriş sözü ilə açan rayon icra hakimiyyətinin başçısı Ənvər Seyidəliyev, “Dünya durduqca yaşayacaq lider” mövzusunda məruzə edən icra hakimiyyəti başçısının müavini Sevil Mirzəliyeva və digər çıxışçılar dünya şöhrətli siyasi xadim, ulu öndər Heydər Əliyevin Vətən və xalq qarşısındakı xidmətlərindən danışıblar. Qeyd olunub ki, müstəqil Azərbaycanın milli inkişaf modelinin banisi olan dahi şəxsiyyət dövlətçiliyimizin iqtisadi, siyasi, hüquqi və ideoloji əsaslarını elmi prinsiplər əsasında müəyyənləşdirib.
Məruzə və çıxışlarda iftixarla söylənilib ki, bu gün Azərbaycan ümummilli lider Heydər Əliyev siyasi kursunun davamçısı Prezident İlham Əliyevin rəhbərliyi ilə işıqlı gələcəyə doğru inamla addımlayır.
X X X
Dekabrın 12-də Kürdəmirdə müasir Azərbaycan dövlətinin xilaskarı və qurucusu, dahi şəxsiyyət Heydər Əliyevin vəfatının 14-cü ildönümü münasibətilə ümumrayon anım mərasimi keçirilib.
Rayon icra hakimiyyətinin, hüquq mühafizə orqanlarının, idarə, müəssisə və təşkilatların kollektivləri, eləcə də ictimaiyyət nümayəndələri səhər saatlarında Heydər Əliyev parkına gələrək ümummilli lider Heydər Əliyevin abidəsini ziyarət edib, önünə gül dəstələri düzüblər.
Sonra Heydər Əliyev Mərkəzində “Əbədiyaşar Lider” mövzusunda konfrans keçirilib. Konfransda Ulu Öndərə həsr olunan “Şəxsiyyət” filmi nümayiş etdirilib.
Məruzə ilə çıxış edən rayon icra hakimiyyətinin başçısı Ceyhun Cəfərov bildirib ki, Heydər Əliyev Azərbaycanı zamanın sınaqlarından uğurla çıxarıb, gələcək inkişaf strategiyasını müəyyən edib.
Konfransda vurğulanıb ki, bu gün ölkəmizdə qazanılan böyük uğurlar məhz Heydər Əliyev dühasının bəhrəsidir.
Həmin gün şəhərdə Ümummilli Liderin xatirəsinə ehsan süfrəsi açılıb.
X X X
Şamaxıda müasir Azərbaycan dövlətinin memarı və qurucusu, xalqımızın ümummilli lideri Heydər Əliyevin xatirəsinə həsr olunan anım mərasimi keçirilib.
Rayon rəhbərliyi, idarə, müəssisə və təşkilatların kollektivləri, minlərlə şamaxılı Ümummilli Liderin şəhərin mərkəzindəki abidəsini ziyarət edərək xalqın böyük xilaskarının xatirəsinə ehtiramlarını bildirib, önünə tər çiçək dəstələri düzüblər.
Heydər Əliyev Mərkəzində davam etdirilən tədbirdə çıxış edən rayon icra hakimiyyətinin başçısı Asif Ağayev Ulu Öndərin həyatı və siyasi fəaliyyətindən danışıb, Ümummilli Liderin hakimiyyətinin istər sovet, istərsə də müstəqillik dövründə ölkəmizin hərtərəfli inkişaf etdiyini bildirib.
Tədbirdə çıxış edən rayon prokuroru Zakir Müslümov, Ağsaqqallar Şurasının sədri Mayıl Alıcanov, YAP rayon təşkilatının sədri Bəxtiyar Abbasov və Mədrəsə qəsəbə tam orta məktəbinin müəllimi Rahib Qasımov Ulu Öndərin azərbaycançılıq məfkurəsindən, ölkəmizin müstəqilliyi və çiçəklənməsi yolunda atdığı addımlardan söz açıb, onun əziz xatirəsinin Azərbaycan xalqının qəlbində əbədi yaşayacağını söyləyiblər.
Sonda Heydər Əliyevin xatirəsinə həsr olunan “Sən həmişə bizimləsən” adlı sənədli filmə və Ulu Öndərin həyat və fəaliyyətinin müxtəlif illərinin ayrı-ayrı məqamlarını əks etdirən fotolara baxış olub.
X X X
Ümummilli lider Heydər Əliyevin əziz xatirəsi Qobustan rayonunda da ehtiramla yad edilib.
Rayon rəhbərliyi, ictimaiyyət nümayəndələri, o cümlədən ağsaqqallar və gənclər dekabrın 12-də Heydər Əliyev parkına gələrək Ulu Öndərin abidəsi önünə çiçəklər qoyub, dahi liderə öz ehtiramlarını bildiriblər.
Sonra Heydər Əliyev Mərkəzində anım tədbiri keçirilib. Rayon icra hakimiyyətinin başçısı Adil Məmmədov mərasimi açaraq deyib: “Ümummilli lider Heydər Əliyev müstəqil Azərbaycan dövləti üçün bir insanın həyatı boyunca edə biləcəyi hər şeyi edib və ömrünün ən möhtəşəm əsərini – müstəqil Azərbaycanı yaradaraq əbədiyyətə qovuşub. Bəli, o, bütün ömrünü Azərbaycanın bu gününə, sabahına həsr etdi. İndi gündən-günə daha da güclənən, inkişaf edən müstəqil Azərbaycanın qazandığı hər bir uğur Heydər Əliyev ömrünün davamıdır”.
Yığıncaqdakı çıxışlarda Ulu Öndərin xalq qarşısındakı xidmətləri konkret faktlarla bir daha diqqətə çatdırılıb, gələcək neçə-neçə nəslin Heydər Əliyev məktəbindən ölkəmizin inkişafı, xalqın rifahı naminə faydalanacağını bildiriblər.
X X X
İsmayıldakı Heydər Əliyev Mərkəzində “Heydər Əliyev idarəetmə məktəbi”nin “Azərbaycan tarixinin Heydər Əliyev epoxası: inkişaf, xilaskarlıq və yüksəliş” mövzusunda məşğələsi keçirilib.
Məşğələdə Ulu Öndərin İsmayıllıya səfərlərinin şahidi olan ziyalılar, ictimaiyyət nümayəndələri, icra strukturlarının, pedaqoji sahənin işçiləri, veteranlar, gənclər iştirak ediblər. Ümummilli lider Heydər Əliyevin əziz xatirəsi bir dəqiqəlik sükutla yad edilib, həyat və fəaliyyətini əks etdirən filmə baxılıb.
Rayon icra hakimiyyəti başçısının müavini, YAP İsmayıllı rayon təşkilatının sədri Sevil Əhmədova “Heydər Əliyev şəxsiyyətində milli liderliklə siyasi liderlik vəhdətdə olub” mövzusunda məruzə edib. Həmçinin “Ümummilli lider Heydər Əliyevin çoxistiqamətli siyasəti ümumxalq maraqları üzərində qurulurdu”, “Ümummilli lider Heydər Əliyev Azərbaycanın xilaskarıdır” və “Heydər Əliyev Azərbaycan dövlətçiliyinin yaradıcısı və qurucusu olub” mövzularında dövlət qulluğu veteranı Valeh Salehovun, kənd təsərrüfatı idarəsinin rəisi Həsən Həsənovun, Təzəkənd tam orta məktəbinin direktoru Elxan Bədəlovun çıxışları dinlənilib.
Rayon icra hakimiyyətinin başçısı Mirdaməd Sadıqov çıxış edərək vurğulayıb ki, Heydər Əliyev şəxsiyyəti daim öyrənilməlidir. Həyat fəaliyyətinin, dövlət siyasətinin elə bir istiqaməti yoxdur ki, Heydər Əliyev dühasından kənarda qalsın. Ulu Öndərin ümumxalq maraqlarına əsaslanan siyasəti Azərbaycanı yüksək inkişaf səviyyəsinə çatdırıb, çətin zamanda xilas edib və dünya miqyasına çıxarıb.
Məşğələdə Ulu Öndərə həsr olunan şeirlər səsləndirilib.
Həmin gün İsmayıllı sakinləri ümummilli lider Heydər Əliyevin mərkəzi meydandakı abidəsini ziyarət edib, önünə gül-çiçək düzüblər. Ziyarətçilər daha sonra Heydər Əliyev Mərkəzində Ulu Öndərin həyat və fəaliyyətini əks etdirən filmə baxıblar.
X X X
Dekabrın 12-də Ucar rayonunda ümummilli lider Heydər Əliyevin vəfatının 14-cü ildönümü münasibətilə anım mərasimləri keçirilib.
Mərasimlər rayon mərkəzində, habelə Qazıqumlaq və Çiyni kəndlərində Ulu Öndərin abidələri önündə keçirilib.
Rayon rəhbərliyinin, idarə, müəssisə və təşkilat kollektivlərinin, ümumtəhsil məktəblərinin şagird və müəllimlərinin iştirak etdikləri tədbirlərdə ümummilli lider Heydər Əliyevin müasir müstəqil Azərbaycanın qurulması və inkişaf etdirilməsində əvəzsiz xidmətlərindən danışılıb.