DÖVLƏT XƏZİNƏDARLIĞI AGENTLİYİ MALİYYƏ NAZİRLİYİNİN TƏRKİBİNDƏ YENİ QURUMDUR
Bakı, 10 fevral (AZƏRTAC). Azərbaycan Prezidenti İlham Əliyevin 9 fevral tarixli Fərmanı ilə Maliyyə Nazirliyinin tərkibində Dövlət Xəzinədarlığı Agentliyi yaradılmışdır.
Agentlik dövlət büdcəsinin kassa icrasını həyata keçirən və həmin maliyyə əməliyyatlarının uçotunu aparan, büdcə xərcləri üzrə dövlətin adından büdcə təşkilatları qarşısında öhdəlikləri qəbul edən, Azərbaycan Respublikasında dövlətə məxsus maliyyə vəsaitlərinin vahid mərkəzdən idarə edilməsi, bu vəsaitlərin daxil olması və məqsədyönlü xərclənməsi sahəsində cari nəzarəti həyata keçirəcəkdir. Qurum bu işləri ölkənin bütün ərazisində bilavasitə və rayon, şəhər üzrə maliyyə idarələrinin, şöbələrinin xəzinədarlıq strukturları və regional (zona) xəzinədarlıq orqanları vasitəsilə görəcəkdir.
Büdcə təşkilatlarının satın aldığı mallara, qəbul etdiyi iş və xidmətlərə görə qabaqcadan dövlət (büdcə) öhdəlikləri götürmək, bu öhdəliklər çərçivəsində satınalmalardan yaranan kreditor borclarının ödənilməsini həyata keçirmək, dövlət büdcəsinin icrasını yerinə yetirməklə büdcə gəlirlərinin büdcəyə daxilolmasını və xərclərinin vahid büdcə təsnifatına uyğun olaraq ünvanlı istifadəsini, dövlət xəzinədarlığının inkişafını, vahid xəzinə hesabının idarə olunmasını, bu hesabdan vəsaitin silinməsinə sərəncam verilməsini təmin etmək yeni qurumun fəaliyyət istiqamətləridir.