Deputat: Azərbaycan-Çin əməkdaşlığı üçün çox möhkəm platforma qurulub
Bakı, 1 aprel AZƏRTAC
Azərbaycan həyata keçirdiyi uğurlu xarici siyasətlə özünü dünyada etibarlı tərəfdaş kimi tanıda bilib. Ölkəmiz, eyni zamanda, dünyanın müxtəlif qütblərini təmsil edən dövlətlərlə də uğurlu əməkdaşlıq qura bilib. Bu sırada, təbii ki, Çin də var.
Bunu Milli Məclisin deputatı Vüqar İskəndərov AZƏRTAC-a açıqlamasında deyib.
Azərbaycan-Çin əməkdaşlığının önəmini xüsusilə vurğulayan deputat deyib: “Yeni dünya düzənində Çinin həm güclü iqtisadiyyatı, həm də siyasi iradəsi ilə daha böyük rol oynayacağı heç kəsdə şübhə doğurmur. Bu səbəbdən Azərbaycan-Çin münasibətlərinin yüksək səviyyədə olması milli maraqlarımız baxımından xüsusi əhəmiyyətə malikdir. Bəlli olduğu kimi, Çin, eyni zamanda, beynəlxalq arenada birqütblülüyün bərqərar olmamasının əsas qarantıdır. Bir hegemon mərkəzdən çıxan ədalətsiz qərarların qarşısında yalnız Çin dayana bilir. Misal kimi, pandemiya dövründə vaksinasiya ilə bağlı yaranmış vəziyyəti göstərmək olar. Avropa dövlətləri və ABŞ öz ehtiyaclarından qat-qat artıq vaksin ehtiyatı topladıqları halda, Çin öz vətəndaşlarını vaksinasiyadan keçirməklə paralel digər ölkələrə də vaksin ixracı həyata keçirirdi. Halbuki, əksər vaksin istehsalçısı qərb dövlətləri peyvənd dozalarını ehtiyac yaranmadığı halda əllərində saxlamağa çalışırdı, ehtiyacı olan ölkələrə göndərmirdi”.
Deputat vurğulayıb ki, Ümummilli Lider Heydər Əliyev hələ SSRİ dövründə Çinin əhəmiyyətini və gələcək perspektivlərini dərk edərək, bu ölkə ilə münasibətlərin inkişafına çalışırdı. Bu xarici siyasət xətti Azərbaycan öz müstəqilliyini bərpa etdikdən sonra da davam etdirildi. İkitərəfli münasibətlərin hazırkı yüksək səviyyəyə çatmasında dövlət başçıları İlham Əliyev və Si Cinpin arasındakı dostluq əlaqələrinin əhəmiyyətli rolu var. Çin Xalq Respublikasının sədri Si Cinpin Prezident İlham Əliyevi Çinin böyük dostu adlandırır.
Ümumiyyətlə, Azərbaycanla Çin arasındakı münasibətlər uğurla inkişaf edir və Prezident İlham Əliyev Davosa səfəri zamanı Çinin CGTN televiziya kanalına müsahibəsində də bu məqamın üzərində xüsusilə dayanıb. Dövlətimizin başçısının bəyan etdiyi kimi, əməkdaşlığımız üçün tərəfimizdən çox möhkəm platforma qurulub. Otuz il ərzində davam edən siyasi münasibətlər artıq bizim yaxşı tərəfdaş və bir-birinə etibar edən dostlar olduğumuzu nümayiş etdirir. Bizim beynəlxalq təsisatlar çərçivəsində çox yaxşı əməkdaşlığımız var. Biz həmişə bir-birimizin ərazi bütövlüyünü və suverenliyini dəstəkləyirik. Biz çox möhkəm siyasi platforma qurmuşuq. İndi isə biz bunun üzərində iqtisadi əməkdaşlığımızı qururuq. Bugünkü vəziyyətdə bu, çox mühümdür, çünki yeni çağırışlar, yeni problemlər və yeni imkanlar mövcuddur”.
Bölmənin digər xəbərləri
