Füzuli rayonunun Əhmədalılar kəndinə təbii qaz verilmişdir
Füzuli, 19 dekabr (AZƏRTAC). Füzuli rayonunun Əhmədalılar kəndinə təbii qaz verilmişdir.
AZƏRTAC xəbər verir ki, bu məqsədlə keçirilən toplantıda çıxış edən rayon icra hakimiyyətinin başçısı Alı Alıyev və Milli Məclis sədrinin müavini Bahar Muradova sakinləri qaz çəkilişi münasibətilə təbrik etmiş, ölkədə və rayonda gedən sosial-iqtisadi inkişafdan, görülmüş işlərdən danışmışlar.
Bildirilmişdir ki, Əhmədalılar kəndinin qazlaşdırılması üçün 2 min 930 metr 125 millimetrlik, 8 min 500 metr 63 millimetrlik, 4 min 500 metr 32 millimetrlik qaz xətləri çəkilmişdir. 350 abonentə sayğac və qaztənzimləyicilər quraşdırılmışdır.
Məlumat verilmişdir ki, indiyədək Horadiz şəhəri, Mollaməhərrəmli, Arayatlı, Babı, Kərimbəyli, Şükürbəyli, Böyük Bəhmənli kəndləri qazlaşdırılmışdır. Rayonda 3350 abonent mavi yanacaqdan istifadə edir. Hazırda Qazaxlar, Mirzənağılı və Alxanlı kəndlərində qaz çəkilişi davam edir.
Kənd sakinləri onlara göstərilən diqqət və qayğıya görə ölkə rəhbərinə minnətdarlıqlarını bildirmişlər.
Təbii qazın verilməsini bildirən rəmzi məşəl yandırılmışdır.
Bölmənin digər xəbərləri
