NƏSİLLƏRİN YADDAŞI
Bakı, 26 fevral (AZƏRTAC). Ölkəmizin bütün təhsil müəssisələrində olduğu kimi, Bakı Xoreoqrafiya Məktəbində də Xocalı faciəsinin ildönümü hər il yad edilir.
Məktəbin direktoru Nilufər Kərimova bildirmişdir ki, bu il bədii kompozisiya aşağı sinif şagirdləri tərəfindən hazırlanmışdır. Onlar üçün xüsusi hərbi geyim sifariş edilmişdir. Uşaqlar çox səy göstərmişlər. Baletin çoxlu qüvvə və vaxt tələb etdiyinə baxmayaraq, onlar dərsdən sonra həvəslə məşq etmişlər.
Balaca “əsgərlər” hərbi marş və Qarabağ haqqında şeirlər əsasında rep nömrələri ifa etmişlər. Onlar başa düşürlər ki, Vətən dedikdə, təkcə onların evi və məktəbi, valideynləri deyil, gözəl ölkəmizin hər bir guşəsi nəzərdə tutulur. Buna görə də “Xarı bülbül”, “Cıdır düzü”, “Şuşa” və “Qarabağ” sözləri xüsusi vurğu ilə səslənirdi.
Kompozisiyanın sonuncu nömrəsi Vətənimizin müdafiəçilərinə həsr edilmiş “Sıravi Əhməd” şeiri oldu. Bu şeiri dinlədikcə inanırsan ki, rəşadətli əsgərimiz Azərbaycan bayrağını hökmən Qarabağda ucaldacaqdır.
Bölmənin digər xəbərləri
