CƏMİYYƏT
Ruslan Muradov: Ağdam-Hindarx-Ağcabədi yolunda sürpriz minaların olması ehtimalı var
Bakı, 28 fevral, AZƏRTAC
Prezident İlham Əliyevin göstərişinə əsasən, Ağdam-Hindarx-Ağcabədi avtomobil yolu təmizlənərək son istifadəçiyə təhvil verilməlidir.
AZƏRTAC xəbər verir ki, bunu yolun minalardan təmizlənməsi ilə bağlı layihəni icra edən "Safe Point" şirkətinin əməliyyat bölməsinin meneceri Ruslan Muradov deyib.
“Şirkətimiz də hazırda humanitar minatəmizləmə əməliyyatlarını davam etdirməkdədir. Burada məqsəd əhalinin böyük qayıdışını təmin etməkdir. Ağdam-Hindarx-Ağcabədi yolunun uzunluğu 7,5 kilometrdir. Biz ən təhlükəli sektordan - Əfətli kəndindən başlamışıq. Bu isə öz növbəsində 25 hektar ərazini əhatə etməkdədir. Bu günə qədər əsasən tank əleyhinə - TM62, P3 və P2, həmçinin piyada əleyhinə PMD və PM minalar aşkarlanıb. Hələ ki, bizim tərəfimizdən sürpriz minalar aşkarlanmayıb. Amma ərazi haqqında əldə etdiyimiz məlumata görə, sürpriz minaların olması ehtimalı var. Minatəmizləmə həqiqətən çətin və məsuliyyətli bir prosesdir. Bu günlər əməliyyatları itlər vasitəsilə daha da gücləndirmişik”, - deyə menecer qeyd edib.