ŞƏKİDƏ “KANAL-S” TELEVİZİYA ŞİRKƏTİNİN AÇILIŞI OLMUŞDUR
AZƏRTAC xəbər verir ki, Azərbaycan televiziya məkanına yeni ünvan əlavə olunmuşdur. Dekabrın 29-da Şəki şəhərində Kanal-S yerli televiziya şirkəti fəaliyyətə başlamışdır.
Bu münasibətlə ictimaiyyət nümayəndələrinin iştirakı ilə mərasim keçirilmişdir. Açılışı bildirən rəmzi qırmızı lent kəsildikdən sonra tədbir iştirakçıları burada yaradılan şəraitlə yaxından tanış olmuş, studiyalara, iş otaqlarına baxmışlar. Cəmi 17 aya inşa edilmiş 3 mərtəbəli bina qədim Şəkinin milli arxitektura elementləri ilə tam vəhdət təşkil edir.
Çəkiliş studiyasında keçirilən təntənəli mərasimdə Kanal-S-in baş direktoru Rüstəm Əliyev yeni televiziya şirkətinin fəaliyyəti barədə məlumat vermişdir. Qeyd edilmişdir ki, televiziya UNF diapazonunun 43-cü kanalında yayımlanır. Binada 3 çəkiliş studiyası və 30 iş otağı vardır. Ən böyük studiya 585 kvadratmetr, nisbətən kişik studiya 180, xəbər studiyası isə 80 kvadratmetrdir.
Müasir rəqəmli avadanlıqla təchiz olunmuş televiziya fəaliyyətə 3 canlı proqramla başlayır. Hər gün “Kanal-S Xəbər” adlı 2 xəbər proqramı, “Gün gəlir” adlı səhər proqramı, habelə “Hit-miks” adlı musiqi proqramı yayımlanacaq televiziya gün ərzində 18 saat efirdə olacaqdır. Kanal 6 ay ərzində öz istehsalı olan proqramların sayını artıraraq yayımın 55 faizini yerli verilişlərdən təşkil etməyi planlaşdırır. İlk vaxtlar Şəki rayonu ərazisində yayımlanacaq telekanal tezliklə qonşu Balakən, Zaqatala, Qax və Oğuz rayonlarını da əhatə edəcəkdir.
Şəki şəhər İcra hakimiyyətinin başçısı Nazim İbrahimov kanalın fəaliyyətə başlamasını rayonun ictimai-siyasi və mədəni həyatında çox böyük hadisə kimi qiymətləndirmişdir. İcra başçısı birbaşa canlı yayım vasitəsilə şəhər sakinlərini 31 dekabr - Dünya azərbaycanlılarının həmrəyliyi günü və Yeni il bayramı münasibətilə təbrik etmiş, onlara xoş arzularını çatdırmışdır. N.İbrahimov əmin olduğunu bildirmişdir ki, yeni telekanal rayonun sosial-iqtisadi, ictimai-siyasi və mədəni həyatında baş verən bütün yenilikləri tamaşaçılara tez və operativ şəkildə çatdıracaq, Şəkinin qədim tarixini, zəngin mədəni irsini, mədəniyyətini yüksək şəkildə təbliğ edəcək, Azərbaycan televiziya məkanında özünəməxsus layiqli yer tutacaqdır.
Mərasim respublikanın tanınmış incəsənət ustalarının maraqlı konsert proqramı ilə başa çatmışdır.
######
Bölmənin digər xəbərləri
