® "Yenidoğulmuşlarda eşitmənin qiymətləndirilməsi və klinik əhəmiyyəti" mövzusunda dəyirmi masa keçirilib
Dövlət Gömrük Komitəsinin Tibbi Xidmət İdarəsinin Elmi-Təcrübi və Tədris Mərkəzinin, Mərkəzi Gömrük Hospitalının və Britaniya-Azərbaycan Həkim və Stomatoloqlar Assosiasiyasının birgə təşkilatçılığı ilə "Yenidoğulmuşlarda eşitmənin qiymətləndirilməsi və klinik əhəmiyyəti" mövzusunda dəyirmi masa olub.
Dəyirmi masada müxtəlif dövlət və özəl tibb müəssisələrinin yüksəkixtisaslı otorinolarinqoloq və pediatr ixtisasına malik həkim və rezidentlər iştirak ediblər.
Dövlət Gömrük Komitəsinin Tibbi Xidmət İdarəsinin rəis müavini, tibb üzrə fəlsəfə doktoru, dosent İsmayıl Əfəndiyev çıxış edərək beynəlxalq əməkdaşlıqla həyata keçirilən mütəxəssislərarası müzakirələrin tibb işçilərinin peşəkar inkişafında olduqca mühüm əhəmiyyətə malik olduğunu qeyd edib və Tibbi Xidmət İdarəsi tərəfindən həmin sahədə həyata keçirilən davamlı tibbi təhsil tədbirləri və gələcək hədəflər haqqında iştirakçılara məlumat verib.
Rəsmi açılış hissəsində Mərkəzi Gömrük Hospitalının rəisi, Baş həkim Bəxtiyar Musayev sahə üzrə beynəlxalq təcrübənin öyrənilməsinin və tətbiqinin əhəmiyyətindən danışıb. O, eyni zamanda, tərəflər arasında imzalanmış memorandumun gələcək əməkdaşlıqlar və birgə fəaliyyətlər üçün mühüm baza yaratdığını qeyd edib.
Zoom platforması üzərindən onlayn formatda tədbirə qoşularaq çıxış edən “Birminhem” qadın və uşaq hospitalının mama-ginekoloqu, Britaniya-Azərbaycan Həkim və Stomatoloqlar Assosiasiyasının sədri, tibb üzrə fəlsəfə doktoru Fidan İsrafil-Bəyli Mərkəzi Gömrük Hospitalı ilə assosiasiya arasında imzalanmış memorandumun əhəmiyyətindən bəhs edib, həmin sənədin beynəlxalq əməkdaşlıq və təcrübə mübadiləsi baxımından yeni imkanlar yaratdığını diqqətə çatdırıb. O, tədbirin memorandum çərçivəsində keçirilən ilk tədbir olduğunu xüsusi vurğulayaraq, iştirakçıları müzakirələrdə aktiv olmağa dəvət edib.
Daha sonra Mərkəzi Gömrük Hospitalının rəis müavini Nahidə Mahmudova və həkim-otorinolorinqoloq Elvin Əzizovun moderatorluğu ilə davam edən dəyirmi masada East & North Hertfordshire Teaching NHS Trust-a bağlı “Lister Hospital”ın həkim-otorinolorinqoloqu Natavan Ramazanzadə “Yenidoğulmuşlarda eşitmənin qiymətləndirilməsi və klinik əhəmiyyəti” mövzusunda geniş məruzə ilə çıxış edib. Məruzə zamanı yenidoğulmuşlarda eşitmənin qiymətləndirilməsinin müxtəlif patologiyaların erkən aşkarlanması və uşaqların sağlam inkişafının təmin edilməsində mühüm əhəmiyyətə malik olduğu vurğulanıb. Bildirilib ki, həyatın ilk günlərində aparılan eşitmə skrininqi mümkün pozuntuların vaxtında aşkarlanmasına və erkən tibbi müdaxilə ilə nitq və ünsiyyət bacarıqlarının normal formalaşmasına şərait yaradır və bu sahədə sistemli müayinələrin tətbiqi gələcəkdə sosial və inkişaf problemlərinin qarşısının alınmasında vacib rol oynayır.
Mövzu üzrə aktual yanaşmalar və real təcrübədə rast gəlinən klinik halların müzakirə edildiyi dəyirmi masa iştirakçıların suallarının cavablandırılması ilə yekunlaşıb.
Bölmənin digər xəbərləri
