QAN YADDAŞI
ABŞ AZƏRBAYCANLILARI AMERİKA HÖKUMƏTİNİ XOCALI FACİƏSİNİ PİSLƏMƏYƏ ÇAĞIRMIŞLAR
AZƏRTAC-ın xüsusi müxbiri xəbər verir ki, ABŞ-da fəaliyyət göstərən dörd Azərbaycan icma təşkilatının - Amerikanın Azərbaycan Cəmiyyəti, Hyuston Azərbaycanlıları, Kaliforniyanın Azərbaycan-Amerika Şurası və Dünya Azərbaycanlıları Konqresinin başçıları Xocalı faciəsinin 15-ci ildönümü ərəfəsində dövlət katibi Kondoliza Raysa birgə məktubla müraciət etmişlər. Məktubda bildirilir ki, fevralın 26-da ABŞ-ın 400 min nəfərlik azərbaycanlı icması dünya azərbaycanlıları ilə həmrəy olaraq, Xocalı qırğınının ildönümünü anacaqlar.
Dövlət katibinin diqqətinə çatdırılmışdır ki, 1992-ci il fevralın 25-dən 26-na keçən gecə erməni silahlı qüvvələri Rusiya hərbçilərinin dəstəyi ilə Azərbaycanın Xocalı şəhərində mülki əhalini qırmış və şəhəri darmadağın etmişdir. Bu cinayət təfsilatı ilə bir çox beynəlxalq media mənbələri, o cümlədən BBC, “Nyu-York Tayms”, Röyter və sair tərəfindən işıqlandırılmışdır. Amerikanın “Human Rights Watch” təşkilatı isə o zaman faciəni “münaqişədə indiyə qədər baş verən ən böyük qırğın” adlandırmışdır.
ABŞ-ın Azərbaycan mənşəli vətəndaşları Birləşmiş Ştatların hökumətini Xocalı qırğınını pisləməyə və ATƏT-in Minsk qrupunun həmsədri kimi, Ermənistanla Azərbaycan arasında gedən sülh danışıqlarında fəal vasitəçi rolunu davam etdirməyə çağırmışlar. Onlar xatırlatmışlar ki, “Azərbaycanın işğal edilmiş ərazilərində vəziyyət”lə bağlı məsələ BMT Baş Məclisinin 61-ci sessiyasının gündəliyindədir. Azərbaycan təşkilatlarının başçıları hökuməti ABŞ-ın dünyadakı aparıcı rolundan istifadə edərək, erməni silahlı qüvvələrinin zəbt edilmiş ərazilərdən çıxarılması və orada həyata keçirilən etnik təmizləmənin nəticələrinin aradan qaldırılmasında təkid etməyə çağırmışlar.
Xocalı faciəsinin ildönümü ilə bağlı soydaşlarımız ABŞ-ın müxtəlif ştatlarında anma tədbirləri keçirmişlər. Vaşinqtonda və ətraf ştatlarda yaşayan azərbaycanlılar paytaxtın mərkəzi küçələri ilə yürüş edərək, Ermənistan səfirliyi qarşısında etiraz aksiyası keçirmişlər. Əllərində qara hərflərlə yazılmış “Xocalını unutmayın”, “ABŞ Azərbaycanın ərazi bütövlüyünü dəstəkləyir”, “Ermənistan, Azərbaycandan rədd ol!” və sair şüarlar olan nümayişçilər küçədən keçənlərə Xocalı faciəsi haqqında məlumat vərəqələri paylayırdılar. Eyni ruhlu nümayiş Nyu-Yorkda Ermənistanın BMT-dəki daimi nümayəndəliyi qarşısında da keçirilmişdir. Nyu-Yorkda və ətraf ştatlarda yaşayan həmvətənlərimiz BMT binasına gəlib-gedən diplomatların diqqətini cəlb etmək üçün “Bir milyon azərbaycanlı qaçqın ədalət intizarındadır”, “Erməni terrorçularına regional əməkdaşlıq layihələrində yer yoxdur” kimi şüarlar qaldırmışdılar.
Amerikanın Azərbaycan Cəmiyyətinin Vaşinqton üzrə təmsilçisi Bədir Məmmədli AZƏRTAC-ın müxbirinə demişdir: “Bu il biz təkcə küçə aksiyaları ilə kifayətlənməmişik. ABŞ-da yaşayan azərbaycanlılar hələ bir ay əvvəl Konqresə məktub kampaniyasına başlayıblar. Hərə yaşadığı ştatın Konqres üzvünə və qubernatoruna Xocalı faciəsi və Ermənistanın Azərbaycanın başına gətirdiyi müsibətlər haqqında həqiqətləri əks etdirən müraciət göndərmişdir. Bəzi Konqres üzvləri və qubernatorlardan artıq cavablar almışıq. Onlar bu məsələni diqqətdə saxlayacaqlarına söz veriblər.”
Texas və Kaliforniya ştatlarında da Xocalı faciəsini anma mərasimləri keçirilmişdir. Hyuston Azərbaycanlıları Təşkilatı Hyuston şəhərinin mərkəzi kitabxanasında tədbir keçirərək, Ermənistan-Azərbaycan, Dağlıq Qarabağ münaqişəsinin tarixindən danışmışlar. Amerikalılar təşkilatın vitse-prezidenti Yusif Babanlının mühazirəsindən Xocalı faciəsi haqqında ətraflı məlumat almışlar. Burada “Lider” televiziyasının “Məhv edilmiş şəhər” sənədli filmi də nümayiş etdirilmişdir.
Azərbaycanın Los-Anceles şəhərindəki Baş konsulluğunda keçirilən anma tədbirində isə Baş konsul Elin Süleymanov çıxış edərək Xocalı soyqırımının tarixindən, ermənilərin vəhşiliklərindən danışmışdır. Tədbirdə, həmçinin Türkiyənin Los-Ancelesdəki Baş konsulu Engin Ansay da çıxış etmişdir.