ABŞ-da yaşayan Azərbaycan icması Dövlət Bayrağı Gününü virtual formada qeyd edib
Vaşinqton, 10 noyabr, AZƏRTAC
ABŞ-ın müxtəlif ştatlarında yaşayan Azərbaycan icmasının üzvlərinin təşəbbüsü və təşkilatçılığı ilə Azərbaycanın Dövlət Bayrağı Günü qeyd olunub.
AZƏRTAC xəbər verir ki, virtual tədbirdə ABŞ-da yaşayan 100-dək soydaşlarımız, eləcə də türk, Pakistan, rus və yəhudi icmalarının nümayəndələri iştirak ediblər.
Tədbirin moderatoru, Meyn ştatında Azərbaycan Cəmiyyətinin təsisçisi və prezidenti Tərlan Əhmədov qonaqları salamlayaraq tədbirin Şuşanın azad olunması xəbəri ilə üst-üstə düşdüyünü, bunun da bayram əhval-ruhiyyəsini iki dəfə artırdığını qeyd edib.
Əvvəlcə Ermənistanın Azərbaycana təcavüzü nəticəsində həyatını itirmiş şəhidlərimizin xatirəsi yad edilib.
Sonra Azərbaycan-Amerika Musiqi Fondunun təsisçisi və icraçı direktoru Cəmilə Cavadova-Spitzberg və soprano ifaçısı Ariel Hernandezin ifasında Azərbaycanın və ABŞ-ın himnləri səsləndirilib.
T.Əhmədov Cəbrayıl, Zəngilan, Füzuli, Qubadlı və Şuşa şəhərlərinin azad olunduğunu vurğulayıb, xalqımızı, o cümlədən icma nümayəndələrini Ordumuzun uğurları münasibətilə təbrik edib.
Azərbaycanın ABŞ-dakı səfiri Elin Süleymanov çıxış edərək Dövlət Bayrağı Günü və döyüşlərdə qazanılmış qələbələr münasibətilə iştirakçıları təbrik edib. Ölkəmizin çətin bir dövrdən keçdiyini və xaricdə yaşayan həmvətənlərimizin həmrəylik göstərməsindən fərəh hissi keçirdiyini deyən diplomat bununla bağlı sosial şəbəkələrdə vətəndaşlarımızı fəal olmağa və birlik nümayiş etdirməyə çağırıb. Elin Süleymanov bu tədbirin Şuşanın azad olunması günü ilə üst-üstə düşməsinin xoş təsadüf olduğunu bildirib.
Azərbaycan Respublikasının Diasporla İş üzrə Dövlət Komitəsinin nümayəndəsi Vüqar Məmmədov çıxışında Komitə sədri Fuad Muradovun iştirakçılara salamlarını və təbriklərini çatdırıb.
Tədbirin bədii hissəsinin açılışını edən Azərbaycanın Əməkdar artisti, Milli Musiqi Qlobal Mədəniyyət Cəmiyyətinin prezidenti, professor Nərgiz Əliyarova Azərbaycan mədəniyyəti və musiqisinin tarixi, Qərb və Şərq dəyərlərinin bir araya gəlməsində rolu haqqında məlumat verib, bu xüsusda Qara Qarayevin xüsusi rolunu vurğulayıb.
ABŞ Azərbaycanlıları Şəbəkəsinin (USAN) həmtəsisçisi və prezidenti Adil Bağırov, “My Way” Uşaq və Gənclər Mərkəzinin direktoru Alyona Bədəlova, ABŞ-da Pakistan Mədəniyyət Mərkəzinin nümayəndəsi Qaiser Navab, ABŞ-da fəaliyyət göstərən TASC-ın (Turkish American National Steering Committee) həmtəsisçisi, türk icmasının fəal nümayəndəsi Gunay Evinç, Günaz televiziyasının rəhbəri Əhməd Obalı da tədbirdə çıxış ediblər.
Aqil Süleymanov (muğam), Nərgiz Əliyarova (piano) və Aqil Hüseynov (tarda ifa), o cümlədən xarici musiqiçilər tərəfindən Qara Qarayevin “İldırımlı yollarla”, “Vətən” əsərləri, muğam ustası Jeffrey Verbok kamançada Azərbaycan muğamı ifa olunub.
AZƏRTAC-ın Vaşinqton bürosu
Bölmənin digər xəbərləri
