ABŞ Dövlət katibi ilə Pakistan Baş nazirinin müavini arasında telefon danışığı olub
İslamabad, 10 may, Hilal Əhməd, AZƏRTAC
ABŞ Dövlət katibi Marko Rubio ilə Pakistanın Baş nazirinin müavini Məhəmməd İshaq Dar arasında telefon danışığı olub.
AZƏRTAC xəbər verir ki, bu barədə Pakistanın Xarici İşlər Nazirliyi məlumat yayıb.
Bildirilib ki, danışıq zamanı Hindistanın Pakistana hücumlarından sonra Cənubi Asiyada mövcud vəziyyət və Pakistanın cavab tədbirləri müzakirə edilib. Tərəflər sıx əlaqə saxlamaq barədə razılığa gəliblər.
Pakistan mətbuatının şənbə günü yaydığı məlumata görə, ABŞ Dövlət katibi Marko Rubio Ordu Qərargah rəisi general Asim Munir ilə telefon danışığı keçirərək, həm Pakistanın, həm də Hindistanın gərginliyin azaldılması istiqamətində addımlar atmasının vacibliyini vurğulayıb.
Pakistanın Baş naziri Məhəmməd Şahbaz Şərif Səudiyyə Ərəbistanının mövcud vəziyyəti sakitləşdirmək və bölgədə sülhü bərqərar etmək üçün diplomatik səylərini yüksək qiymətləndirib. O, ötən axşam İslamabadda ona zəng edən Səudiyyə Ərəbistanı Krallığının xarici işlər üzrə dövlət naziri Adel Əl-Cubeyrlə danışıb. Baş nazir Hindistanın Pakistana qarşı həyata keçirdiyi raket və PUA hücumları nəticəsində mülki vətəndaşların, o cümlədən qadınların və uşaqların şəhid olmasını, mülki infrastrukturlara ziyan vurulmasını qətiyyətlə pisləyib.
Bölmənin digər xəbərləri
