ABŞ nəşrində Ermənistan-Azərbaycan münasibətlərinə dair məqalə dərc olunub
Bakı, 21 sentyabr, AZƏRTAC
ABŞ-ın nüfuzlu “The National Interest” dərgisində Beynəlxalq Münasibətlərin Təhlili Mərkəzinin (BMTM) İdarə Heyətinin sədri Fərid Şəfiyev və şöbə müdiri Vasif Hüseynovun “Ermənistan-Azərbaycan sülh prosesi dayanıbmı?” sərlövhəli məqaləsi dərc olunub.
BMTM-dən AZƏRTAC-a bildirilib ki, müəlliflər məqalədə sentyabrın 13-dən etibarən Ermənistan qüvvələrinin Azərbaycan mövqelərinə qarşı təxribatı barədə məlumat veriblər. Qeyd olunub ki, sərhəddə toqquşmalar keçən ay Avropa İttifaqı Şurasının Prezidenti Şarl Mişelin vasitəçiliyi ilə Brüsseldəki danışıqlardan sonra baş verib. Diqqətə çatdırılıb ki, əvvəlki üç görüşdə Azərbaycanın təşəbbüsü ilə hər iki ölkənin ərazi bütövlüyünün qarşılıqlı tanınmasına dair beş bəndlik təklif əsasında sülh müqaviləsinin imzalanmasına ümidlər yaransa da, son görüşdə Ermənistan qondarma status məsələsini toxunaraq Qarabağ münaqişəsini gündəmə qaytarmağa cəhd göstərib. “Bundan əlavə, sülh razılaşmasına kimi həll edilməli olan daha üç məsələ var. Birincisi, otuz il Ermənistanın nəzarətində olan və beləliklə də heç vaxt müəyyən edilməmiş sərhədlərin delimitasiyası, ikincisi, nəqliyyat əlaqələrinin açılması və üçüncüsü, minalar, məhbuslar və itkin düşmüş şəxslər kimi humanitar problemlərin həlli”,- deyə müəlliflər bildiriblər.
Oxucuların diqqətinə çatdırılıb ki, Nikol Paşinyan Azərbaycanla Naxçıvan arasında Ermənistanın cənub ərazilərindən keçən Zəngəzur dəhlizi boyu dəmir yolunun tikintisi ilə bağlı mövqeyini də dəyişib. Ötən il Paşinyan dəmir yolunun tikintisinin məqbul olduğunu bəyan etmiş və yalnız bu marşrut üzrə magistral yolun asfaltlanması ideyasını rədd etmişdi. Hətta mayın 22-də keçirilən görüşdən sonra Azərbaycan Prezidenti İlham Əliyev bəyan etmişdi ki, tərəflər Zəngəzur boyunca nəqliyyat marşrutunun yaradılması barədə razılığa gəliblər. Göründüyü kimi, Ermənistan hökuməti indi bu razılaşmadan da geri çəkilib.
Yazıda bildirilib ki, İkinci Qarabağ müharibəsindən ötən iki il status-kvo davam edərsə, toqquşmaların dayanmayacağını göstərdi. Vurğulanıb ki, hər iki tərəf hərbi əməliyyatları dayandırmaq üçün qısa vaxtda bir sıra aktual məsələlər üzrə razılığa gəlməlidir. Ən əsası, Ermənistan ya Qarabağı Azərbaycanın bir hissəsi kimi tanımalı, ya da münaqişəni davam etdirməlidir.
Məqalədə qeyd olunub ki, dövlət sərhədlərinin delimitasiyası və qarşılıqlı tanınması ikitərəfli münasibətlərdə yeni səhifə açacaq.
Təəssüflə vurğulanıb ki, əvvəllər Ermənistanla Azərbaycan arasında münaqişənin həlli ilə məşğul olan böyük dövlətlərin, yəni, Rusiya, Fransa və ABŞ-ın regionda ziddiyyətli maraqları var. ABŞ-ın siyasətinə bəzən müxtəlif daxili maraqlar, məsələn, erməni lobbi qrupları təsir edir. Hətta əvvəlcə perspektivli görünən Brüssel platforması da indi təhlükə altındadır.
Bölmənin digər xəbərləri
