ADHTİ-də “Tələbə və həkimlərin hazırlanmasında müasir texnologiyalar” mövzusunda konfrans keçirilib
Bakı, 20 dekabr, AZƏRTAC
Əziz Əliyev adına Azərbaycan Dövlət Həkimləri Təkmilləşdirmə İnstitutunda (ADHTİ) “Tələbə və həkimlərin hazırlanmasında müasir texnologiyalar” mövzusunda elmi-praktik konfrans keçirilib. Konfrans ADHTİ, Seçenov Universiteti və “Razvitie” MMC-nin birgə təşkilatçılığı ilə reallaşıb.
AZƏRTAC xəbər verir ki, açılış nitqi ilə çıxış edən ADHTİ-nun rektoru professor Nazim Qasımov konfransın Azərbaycan Respublikası ilə Rusiya Federasiyası arasında mövcud olan əməkdaşlıq sazişləri çərçivəsində keçirildiyini bildirib. Ö, ölkəmizdə səhiyyə sistemində gedən inkişafdan danışaraq rəhbərlik etdiyi müəssisədə davamlı tibbi tədris konsepsiyası çərçivəsində tətbiq olunan yeniliklər barədə məlumat verib.
“Razvitie” MMC-nin baş direktoru Vadim Qvozdkov isə yaratdıqları “Piroqov” interaktiv kompleksinın tibbi təhsil sistemındə tətbiqinin üstünlüklərindən danışıb və konfransın işinə müvəffəqiyyət arzulayıb.
Konfrans işini 2 sessiyada davam etdirib. Sessiyalarda əsas məruzəçi kimi Seçenov Universitetinin N.V.Sklifosovski adına Kliniki Tibb İnstitutunun Operativ cərrahiyyə və topoqrafik anatomiya kafedrasının professoru, tibb elmləri doktoru Yuriy Vasilyevlə yanaşı, ADHTİ-nun Stomatologiya və üz-çənə cərrahiyyəsi kafedrasının müdiri dosent Həsən Əsədov və Seçenov Universitetinin Bakı filialının prorektoru Zəhra Vəzirova da çıxış ediblər.
Konfrans iştirakçıları “Piroqov” interaktiv kompleksinin köməyi ilə nümayiş olunan kliniki halların araşdırılmasında fəal iştirak edib, məruzəçilərlə diskussiya aparıblar.
Qeyd edilib ki, səhiyyə sisteminin modernizasiyası və innovasion inkişafı şəraitində istifadə edilən tibbi texnologiyaların, müasir diaqnostika, müalicə, profilaktika və reabilitasiya metodlarının kliniki, sosial və iqtisadi effektliliyini təmin edə bilən tibbi kadrlara böyük ehtiyac duyulur. Belə yüksəkixtisaslı mütəxəssislərin hazırlanması üçün müasir, sübutlu əsaslandırılmış informasiya və texnologiyalara əsaslanan tibbi təhsil konsepsiyası həyata keçirilməlidir. Azərbaycan Dövlət Həkimləri Təkmilləşdirmə İnstitutunda davamlı tibbi təhsil sistemi çərçivəsində bu istiqamətdə bir çox işlər görülüb. Belə ki, institutda tərtib olunan təqvim planlarına əsasən təşkil olunan kurslarda müdavimlərə müasir təbabətin aktual məsələləri haqqında məlumat verməklə yanaşı, onların həlli yolları da göstərilir. Bu zaman müxtəlif endoskopik aparatlardan, xüsusi simulyator-manekenlərdən, mikroskoplardan və s. müasir tədris vasitələrindən istifadə edilir. Proqramlar tərtib edilərkən fənlərarası əlaqələr yaradılmasına xüsusi fikir verilir və onların uzlaşması təmin edilir. 2012-ci ildə ADHTİ-də ilk dəfə Rusiya Federasiyasının paytaxtı Moskvadan translyasiya olunan distant kurslar keçirilib. Həmin kurslar Səhiyyə Nazirliyinin sifarişi əsasında Azərbaycan Dövlət Həkimləri Təkmilləşdirmə İnstitutu ilə Rusiya Federasiyasının Diplomdansonrakı Təhsil Akademiyası arasında təhsil və elmi-pedaqoji kadrların hazırlanması sahəsində imzalanmış müqavilə əsasında təşkil edilib. Hazırda institutda ali tibb kadrlarının diplomdansonrakı təhsilinin müxtəlif növləri əyani və distant formalarda həyata keçirilir. İnstitut kafedralarının keçirdiyi distant və səyyar kurslar respublikamızın bütün bölgələrini əhatə edir.
Müasir təbabətin ən innovasion metodlarından biri də qarın boşluğunda aparılan laporoskopik əməliyyatlardır. Həmin əməliyyatlara yiyələnmək üçün bir neçə ildir ADHTİ-nun Cərrahiyyə kafedrasında invaziv cərrahiyyə kursları keçirilir. Həmin kurslarda müxtəlif ixtisaslı mütəxəssislərin laporoskopik metodun bazis nəzəri biliklərinin və vərdişlərinə yiyələnməsinə xüsusi diqqət ayrılıb. Bu günə qədər yüzlərlə müdavim laporoskopik kurslarda iştirak edib, həmin əməliyyatların aparılması texnikasını öyrənib. Tədris zamanı cərrahi əməliyyatlar müasir mülyajların üzərində və simulyatorlarda laporoskopik alətlərin köməyi ilə icra olunur.
Azərbaycan Dövlət Həkimləri Təkmilləşdirmə İnstitutunda diplomdansonrakı tibb təhsilinin təkmilləşdirilməsi, onun keyfiyyətinin yüksəldilməsi istiqamətində daimi axtarışlar gedir, təhsilin yeni forma və metodları praktikaya daxil edilir. Bu gün institutda keçirilən “Tələbə və həkimlərin hazırlanmasında müasir texnologiyalar” mövzusunda elmi-praktik konfransda da həmin mövzular diqqət mərkəzindədir.
Diqqətə çatdırılıb ki, “Piroqov” interaktiv kompleksi tələbələrə və həkimlərə təbiət elmləri fənlərinin əksəriyyətini öyrətmək üçün ideal olan unikal tədris avadanlığıdır. 4000-dən çox 3D obyekt, eləcə də rahat interfeys vasitəsilə onlarla qarşılıqlı əlaqə qurmaq imkanı dərsləri əyani və yaddaqalan edəcək. Bu, sadəcə olaraq 3D anatomiya atlası deyil, həm də normal və patoloji quruluşun bir çox müfəssəl strukturlarının kompleksidir. Kompleksə həmin strukturların rus, latın və ingilis dillərində daxili təsviri, həmçinin ultrasəs, KT, MRT məlumat bazası, region və sistem üzrə hazırlanmış səhnələrin baza məlumatları yerləşdirilib. Kompleks həm Rusiyanın aparıcı universitetlərində, həm də xarici ölkələrin ixtisaslaşmış universitetlərində gələcək həkimlərin hazırlanmasında uğurla istifadə olunur.
Bölmənin digər xəbərləri
