Ağacların qəsdən qurudulması nəticəsində təbiətə 12 min manata yaxın ziyan dəyib
Bakı, 9 sentyabr, AZƏRTAC
Dövlət Ekoloji Təhlükəsizlik Xidmətinin əməkdaşları tərəfindən keçirilən növbəti nəzarət tədbirləri zamanı paytaxtın Nərimanov rayonu, Təbriz və Həsənoğlu küçələrinin kəsişməsində ağacların quruduğu faktı müəyyən edilib.
Xidmət rəsmisi Bəhruz Məhəmmədov AZƏRTAC-a bildirib ki, araşdırma zamanı ağacların həmin ərazidə tikinti işləri aparan “Ailə Park” Məhdud Məsuliyyətli Cəmiyyəti tərəfindən qəsdən qurudulduğu və təbiətə ümumilikdə 11 min 760 manat məbləğində ziyan dəydiyi müəyyən edilib.
“Dəymiş ziyanın məbləği cinayət tərkibi yaratdığından məsələyə hüquqi qiymət verilməsi üçün toplanmış sənədlər Azərbaycan Respublikası Baş Prokurorluğuna göndərilib”, - deyə B.Məhəmmədov qeyd edib.
Bölmənin digər xəbərləri
