Ağacların quruması və qəzalı vəziyyətə düşməsi qısa müddətdə baş vermir
Bakı, 29 sentyabr, AZƏRTAC
Dövlət Ekoloji Ekspertiza Agentliyində qurumuş və qəzalı vəziyyətdə olan ağacların götürülməsi ilə əlaqədar növbəti ictimai dinləmə keçirilib.
AZƏRTAC xəbər verir ki, Mərdəkan qəsəbəsi, Xəzər Tibb Mərkəzinin həyətində 36 ədəd qurumuş ağacın, Binəqədi rayonunun S.S.Axundov küçəsi, bina 4A, A.Kunanbayev küçəsi bina 11B, 7-ci mikrorayon, 3123-cü məhəllə ünvanında, “Bolluq” İK-nın inşa etdiyi yaşayış binasının həyətində ümumilikdə 10 ədəd müxtəlif cinsli qurumuş ağacların, Səbail rayonu, Badamdar qəsəbəsi S.Məmmədov küçəsi, ev 11, mənzil 11 ünvanında 1 ədəd qəzalı ağacın, Səbail rayonu, Parlament prospekti, 76 ünvanında, Mərkəzi Klinikanın kompleksinin ərazisində 51 ədəd qurumuş şam və 1 ədəd qurumuş sərv ağaclarının, həmçinin Bayıl yamacının cənub hissəsində 100-dən çox qurumuş ağacın, Sabunçu rayonu, Zabrat qəsəbəsi, 20 Yanvar küçəsi, 1 saylı qəbiristanlığın hasarı boyunca 11 ədəd müxtəlif cinsli qurumuş ağacların, Suraxanı rayonunun Əmircan qəsəbəsi Malik Mustafayev küçəsi, ev 8/6 ünvanında isə 1 ədəd qurumuş şam ağacının götürülməsi məsələsi müzakirə edilib.
Ölkəmizdə aparılan yaşıllaşdırma tədbirlərindən bəhs edən Dövlət Ekoloji Ekspertiza Agentliyinin İdarə Heyətinin sədri Mirsalam Qənbərov mövcud yaşıllıqlara qulluq göstərilməsi məsələsinin də ciddi nəzarətdə saxlanıldığını vurğulayıb. M.Qənbərov bildirib ki, mövcud yaşıllıqların qorunması məsələsi təkcə Ekologiya və Təbii Sərvətlər Nazirliyinin fəaliyyət istiqaməti deyil, buna görə icra hakimiyyətləri, o cümlədən bələdiyyələrin də üzərinə vəzifə düşür. Bələdiyyələr öz ərazilərində mövcud olan yaşıllıqlara mülkiyyətləri kimi yanaşmalı, vaxtında və düzgün aqrotexniki qulluq tədbirləri görməlidirlər. Təbii ki, ağacların quruması və qəzalı vəziyyətə düşməsi iqlim amilləri ilə də bağlı ola bilər. Bu zaman həmin qəzalı ağacların götürülməsi üçün vaxtında agentliyə müraciət edilməli, müsbət rəy verildikdən dərhal sonra proses qısa müddətdə icra olunmalıdır. Həmçinin qanunla götürülən ağacların yerində yeni tinglər əkilməli, verilən rəydəki öhdəliklərin hər biri yerinə yetirilməlidir.
"Agentliyə daxil olan hər bir müraciət ciddi araşdırıldıqdan sonra müsbət və ya mənfi rəy verilir. Bəzən ağacın götürülməsinə müsbət rəy verilsə də, prosesin gecikdirilməsi halları qeydə alınır. Ya mütəxəssislərimiz monitorinq apararaq bunu aşkarlayırlar, ya da bu, hansısa xoşagəlməz hallar baş verdikdən sonra üzə çıxır. Həmçinin götürülən ağacların yerinə yenilərinin əkilməməsi halları ilə də qarşılaşırıq. Yəni, rəy veririksə, o demək deyil ki, nəzarət bitmiş sayılır. Proses nəzarətdə saxlanılır, öhdəlikləri yerinə yetirməyənlər isə cəzalandırılırlar", - deyə agentliyin İdarə Heyətinin sədri qeyd edib.
Bələdiyyə nümayəndələri və ekoloqların iştirakı ilə keçirilən müzakirədə ağacların quruması və qəzalı vəziyyətə düşməsinin qısa müddətdə olmadığı, məsuliyyətsiz və laqeyd yanaşma nəticəsində belə vəziyyətlərin yaşandığı diqqətə çatdırılıb. Bildirilib ki, bir ağacın böyüməsi illərlə vaxt aldığı kimi, quruması da uzun müddət ərzində baş verir. Odur ki, yaşıllıqların nəzarətsiz qalması, vaxtında suvarılmaması, ziyanvericilərə qarşı tədbirlər görülməməsi nəticəsində quruma və qəzalı vəziyyətə düşməsi halı yaranır.
Sözügedən ünvanlar üzrə ağacların götürülməsinə müsbət rəy verilən ictimai dinləmədə bələdiyyə nümayəndələrinə yaşıllıqlara qarşı daha diqqətli və mühafizəkar olmaq tövsiyə edilib.
Bölmənin digər xəbərləri
