AĞDAŞ TAXILÇILARI PAYIZ ƏKİNİNƏ CİDDİ HAZIRLAŞIRLAR

30.09.2006 [11:59]
Çap et
A⁺ A^-

Regionların sosial-iqtisadi inkişafı Dövlət Proqramı çərçivəsində son illər Ağdaş rayonunda da təsərrüfatın əsas sahələrindən olan taxılçılıqda uğurlu nəticələr qazanılır. İndi taxılçılıqla məşğul olan torpaq mülkiyyətçiləri payız əkininə ciddi hazırlıq görürlər. Rayon icra hakimiyyətinin aqrar şöbəsində AZƏRTAC-ın müxbirinə bildirmişlər ki, gələn ilin məhsulu üçün payızda 13 min hektarda səpin keçiriləcəyi gözlənilir. Şum qaldırılması, toxum tədarükü sürətlə davam etdirilir. Hələlik 9 min hektardan çox sahədə keyfiyyətli şum qaldırılmışdır. Hər gün sahələrdə orta hesabla 25-30 traktor işləyir.

Bu il yaradılmış Aqrotexserviz taxılçılara lazımi kömək göstərir.

Fermerlər və fiziki şəxslər keyfiyyətli toxum tədarükünü də diqqət mərkəzində saxlayırlar. Artıq 3,6 min ton yüksək reproduksiyalı toxum hazırlanmışdır ki, bu da ehtiyacı lazımınca ödəyəcəkdir. Səpində əsasən akademik Cəlal Əliyevin yetişdirdiyi “Azərİ”, “Bərəkətli”, “Qiymətli”, habelə yerli şərait üçün əlverişli olan “Qılçıqsız-1” taxıl sortlarından istifadə olunacaqdır.

Oktyabrın ilk ongünlüyündən etibarən kütləvi taxıl səpininə başlanacaqdır. Rayonun bir sıra kəndlərində bu işə hazırlıq artıq başa çatdırılmışdır.