Akademik Zərifə Əliyevanın 100 illiyinə həsr olunmuş xatirə gecəsi keçirilib
Bakı, 27 aprel, AZƏRTAC
Azərbaycan Qadın Sahibkarlarının Milli Assosiasiyasının (AQSMA) təşkilatçılığı, “Azman Holding” şirkətinin rəhbəri Azər Əsgərovun xüsusi dəstəyi ilə görkəmli alim, Əməkdar elm xadimi, tibb elmləri doktoru, professor, Azərbaycan Elmlər Akademiyasının həqiqi üzvü Zərifə Əziz qızı Əliyevanın 100 illik yubileyinə həsr olunmuş xatirə gecəsi keçirilib.
Tədbirdə Ailə, Qadın və Uşaq Problemləri üzrə Dövlət Komitəsinin sədr müavini Sədaqət Qəhrəmanova, deputatlar Kamilə Əliyeva, Sevinc Hüseynova, professor Paşa Qəlbinur, QHT-lərə Dövlət Dəstəyi Agentliyinin icraçı direktoru Aygün Əliyeva, “Azman Holding”in nümayəndəsi İlahə Abdullayeva, KOBİA, DSMF və digər dövlət qurumlarının rəhbər şəxsləri, tanınmış ictimaiyyət nümayəndələri iştirak ediblər.
AQSMA-dan AZƏRTAC-a bildirilib ki, əvvəlcə Azərbaycan Respublikasının Dövlət Himni səsləndirilib, akademik Zərifə Əliyevanın və şəhidlərimizin ruhu bir dəqiqəlik sükutla yad edilib.
Daha sonra tədbir iştirakçılarına görkəmli alimin həyat və fəaliyyətini əks etdirən “Xatirələrlə yaşayan ömür” adlı videoçarx nümayiş olunub.
Tədbirin rəsmi hissəsində Azərbaycan Qadın Sahibkarlarının Milli Assosiasiyasının prezidenti Vəfa Əfəndiyeva 2023-cü ilin Azərbaycanda iki unudulmaz insanın - müasir Azərbaycanın memarı və qurucusu, Ümummilli Lider Heydər Əliyevin və Azərbaycan elminin ən parlaq simalarından olan görkəmli oftalmoloq-alim, akademik Zərifə xanım Əliyevanın 100 illik yubileylərinin keçirilməsi ilə əlamətdar olduğunu deyib.
Vəfa Əfəndiyeva sıravi həkimlikdən akademik zirvəsinə ucalan Zərifə xanımın elmi araşdırmaların, alim kimi qazandığı böyük uğurların Azərbaycanın tibb elmi tarixində xüsusi yer tutduğunu deyib: “Görkəmli alimin keçdiyi şərəfli ömür yolu hər bir Azərbaycan vətəndaşı, hər bir alim və həkim üçün həyat və mənəviyyat dərsi, kamillik və müdriklik məktəbidir. Bu gün də Zərifə xanım Əliyeva haqqında söhbət düşəndə gözümüz önündə işıqlı bir obraz - əsl Azərbaycan qadını, vəfalı ömür-gün yoldaşı, fədakar ana obrazı canlanır. Bu gün bu mötəbər tədbirdə Zərifə xanımın ömür yoluna nəzər salarkən bir daha şahid olduq ki, o, əfsanəvi bir həyat yaşayıb. Çox təəssüf ki, taleyin Zərifə xanıma yazdığı ömür payı qısa oldu, o, müstəqil Azərbaycanı Ulu Öndər Heydər Əliyevin zəngin irsinə əsaslanan və onun layiqli davamçısı Prezident İlham Əliyevin müdrik siyasəti nəticəsində sürətlə inkişaf edən, gələcəyə inamla baxan, gündən-günə gözəlləşən, müasirləşən Vətənimizin bu gününü görmədi. Lakin qəlbimizdə bu təəssüflə yanaşı, bir inam da var: səhiyyəmizin tərəqqisi, tibb elmində qazanılan uğurlar görkəmli alimin xatirəsinə ucaldılan ən möhtəşəm abidədir. Əsl yaradıcılıq, əsl elm daimidir. Akademik Zərifə xanım Əliyevanın işıqlı obrazı heç zaman ürəklərdən silinməyəcək”.
Azərbaycan Respublikası Sahibkar Qadınlar İctimai Birliyinin sədr müavini Afaq Əliyevanın moderatorluğu ilə keçirilən xatirə gecəsinin rəsmi hissəsi qonaqların çıxışları ilə davam edib.
Ailə, Qadın və Uşaq Problemləri üzrə Dövlət Komitəsinin sədr müavini Sədaqət Qəhrəmanova çıxış edərək, Zərifə xanım Əliyevanın Azərbaycan elminə və ailə institutuna verdiyi töhfələrdən bəhs edib. Bildirib ki, görkəmli oftalmoloq-alim, akademik Zərifə Əliyevanın alim kimi qazandığı böyük uğurlar Azərbaycan tibb elminin tarixində ayrıca bir mərhələ təşkil edir: “Onun keçdiyi şərəfli ömür yolu hər bir Azərbaycan vətəndaşı, hər bir alim və həkim üçün həyat və mənəviyyat dərsi, kamillik və müdriklik məktəbidir”.
Professor Paşa Qəlbinur Zərifə xanım Əliyevanın unudulmaz xatirəsinin Prezident İlham Əliyevin Müzəffər Sərkərdə missiyasında yaşadığını bildirib və Zərifə xanımın ictimai fəaliyyətini Azərbaycan Respublikasının Birinci vitse-prezidenti, Heydər Əliyev Fondunun rəhbəri Mehriban xanım Əliyeva tərəfindən bu gün daha geniş miqyasda şərəflə, məsuliyyətlə davam etdirildiyini qeyd edib.
Deputat Kamilə Əliyeva çıxışında akademik Zərifə xanım Əliyevanın elmi-pedaqoji fəaliyyətindən, çoxşaxəli elmi-tədqiqat işlərindən, yüksəkixtisaslı gənc alim kadrları yetişdirməsindən, xalqının tərəqqisi və maariflənməsinə əvəzsiz töhfələr verməsindən bəhs edib.
Deputat Sevinc Hüseynova Zərifə xanım Əliyevanın mənalı və zəngin həyat yolundan nümunələr gətirərək, onun Azərbaycan cəmiyyətinə verdiyi töhfələrdən söz açıb. O, qayğıkeş həkim Zərifə xanım Əliyevanın həyat yolunun nümunə göstərilə biləcək qədər mənalı, zəngin olduğunu vurğulayıb.
Həmçinin çıxış edən QHT-lərə Dövlət Dəstəyi Agentliyinin icraçı direktoru Aygün Əliyeva Zərifə xanım Əliyevanın 100 illik yubileyinin ölkəmizdə geniş qeyd edildiyini bildirib: “Zərifə xanımın timsalında biz qadının zərifliyi ilə qüdrətinin birləşməsinin, Azərbaycan qadınlarının ən yaxşı keyfiyyətlərinin unikal vəhdətini görürük. O, həm də xalqımızın milli-mənəvi dəyərlərinin zənginləşməsinə özünün əvəzsiz töhfələrini verib”.
“Azman Holding”in nümayəndəsi İlahə Abdullayeva isə çıxışında təmsil etdiyi şirkətin hər zaman bu kimi tədbirlərə dəstək verdiyini və bundan məmnunluq duyduqlarını qeyd edib.
Tədbir bədii proqramla davam edib.
Bölmənin digər xəbərləri
