AKTAUDA HEYDƏR ƏLİYEVİN 85 İLLİK YUBİLEYİ İLƏ ƏLAQƏDAR MƏRASİM OLMUŞDUR
AZƏRTAC-ın xüsusi müxbiri xəbər verir ki, Azərbaycanın Qazaxıstandakı səfirliyi Məngistay vilayət hakimiyyəti və buradakı “Dostluq” Azərbaycan Mədəniyyət Mərkəzi ilə birgə Ş.Esenov adına Aktau Dövlət Universitetində ümummilli lider Heydər Əliyevin 85 illik yubileyi ilə əlaqədar mərasim keçirmişdir.
Tədbirdə Aktaudakı diasporumuzun üzvləri, universitetin professor-müəllim heyəti, tələbələr, yerli jurnalistlər iştirak etmişlər.
Mərasimi giriş sözü ilə açan universitetin rektoru, professor Abdumutalip Abjapparov Heydər Əliyevin müasir Azərbaycanın tarixində tutduğu mövqedən danışmış, Məngistay vilayət hakiminin müavini Jumabay Karayev Heydər Əliyevi dünyanın ən böyük siyasətçiləri ilə müqayisə etmişdir.
Azərbaycanın Qazaxıstandakı səfiri Lətif Qəndilov “Böyük yolun mərhələləri” mövzusunda geniş və əhatəli məruzə ilə çıxış etmişdir. Səfir əbədi dostluğumuzdan danışmış, keçmiş SSRİ dövründə baş vermiş Almatı hadisələri və Heydər Əliyevin Siyasi Büroda bu iğtişaşlarla əlaqədar Mixail Qorbaçova kəskin etirazıından, xalqımızın ümummilli liderinin SSRİ dövründə Qazaxıstana rəhbərlik etmiş şəxslərdən biri - Dinməhəmməd Kunayevlə, həmçinin indiki dövlət başçısı Nursultan Nazarbayevlə dostluğundan söhbət açmışdır.
“Dostluq” Azərbaycan Mədəniyyət Mərkəzinin sədri, professor Yusif Quliyevin “Heydər Əliyev müasir Azərbaycanın qurucusudur” mövzusundakı çıxışı da iştirakçılar tərəfindən maraqla qarşılanmışdır.
Sonra “Dostluq” Azərbaycan Mədəniyyət Mərkəzinin xalq çalğı alətləri ansamblı geniş konsert proqramı ilə çıxış etmişdir.
Bölmənin digər xəbərləri
