Ali Məhkəmənin Plenumu keçirilib
Bakı, 23 aprel, AZƏRTAC
Aprelin 23-də Ramiz Rzayevin sədrliyi ilə Azərbaycan Respublikası Ali Məhkəməsinin Plenumu keçirilib.
Ali Məhkəmənin mətbuat xidmətindən AZƏRTAC-a verilən məlumata görə, Ali Məhkəmənin sədri Plenum iclasını açaraq bildirib ki, Azərbaycan Respublikasının Prezidenti İlham Əliyevin rəhbərliyi ilə ölkəmizdə koronavirus (COVID-19) infeksiyasının yayılması təhlükəsinin qarşısının alınması məqsədilə həyata keçirilən qabaqlayıcı tədbirlər nəticəsində ölüm halları minimuma endirilib. Vaxtında sərhədlər bağlanıb, xüsusi karantin rejimi yaradılıb, daxili imkanlar hesabına xüsusi xəstəxana inşa edilib, lazımi dezinfeksiya işləri görülüb, maska, spirt və antivirus əleyhinə digər vasitələrin istehsalına başlanılıb. Əhali pandemiyaya qarşı mübarizə üçün səfərbərliyə alınıb, “Evdə qal” kampaniyasına cəlb olunub. Kütləvi informasiya vasitələri ictimaiyyəti pandemiya ilə bağlı vaxtaşırı məlumatlandırır və maarifləndirir. Dövlət tərəfindən aztəminatlı ailələrə yardımlar göstərilir. Zərurət yarandığı hallarda vətəndaşların SMS-lə icazə almaları təmin edilir. Bütün bu təxirəsalınmaz tədbirlər Ümumdünya Səhiyyə Təşkilatı tərəfindən yüksək qiymətləndirilir və beynəlxalq miqyasda pandemiyaya qarşı mübarizə sahəsində Azərbaycan modelinin yarandığını sübut edir. Əlbəttə, bütün bu işlərdə fədakar həkimlərimizin, polislərimizin, jurnalistlərimizin mühüm əməyi var. Qeyd edilib ki, respublikamızda xüsusi karantin rejiminin mərhələli şəkildə aradan qaldırılması nəzərdə tutulub və buna görə karantin rejimi mayın 4-dək uzadılıb.
Plenumda xüsusi karantin rejiminin uzadılmasını nəzərə alaraq “Azərbaycanda Respublikasında koronavirus (COVID-19) infeksiyasının yayılması təhlükəsinin qarşısının alınması məqsədilə məhkəmələrdə həyata keçirilməsi zəruri olan tədbirlər haqqında” Qərar qəbul edilib.
Qərarda Azərbaycan Respublikasının bütün məhkəmələrinə təxirəsalınmaz qaydada baxılmalı olan, yaxud məhkəmə baxışının keçirilməsini tələb etməyən işlərə (qətimkan tədbirlərinin seçilməsi, uzadılması, dəyişdirilməsi, ləğvi, inzibati həbs nəzərdə tutulan işlər, iddianın təmin tədbirlərinin görülməsi, əmr icraatı, kiçik iddialara dair işlər üzrə sadələşdirilmiş icraat, bəzi kateqoriya üzrə xüsusi icraat işləri və sair) baxılması istisna olunmaqla, icraatlarında olan digər işlərə baxılmasının müvəqqəti olaraq təxirə salınması tövsiyə edilib. Məhkəmələrə, həmçinin İnzibati-Prosessual Məcəllənin 16-cı maddəsinin tələbləri nəzərə alınmaqla inzibati məhkəmə icraatı qaydasında baxılan işlərə şifahi məhkəmə baxışı (şifahi dinləmələr) keçirilmədən baxılması imkanlarından, eləcə də Mülki Prosessual Məcəllənin tələbləri nəzərə alınmaqla mülki işlər və kommersiya mübahisələri üzrə məhkəmə icraatının “Elektron məhkəmə” informasiya sistemi vasitəsilə aparılması imkanlarından istifadə edilməsi tövsiyə olunub.
Koronavirus infeksiyasının yayılması təhlükəsi tam aradan qaldırılmadığından Azərbaycan Respublikası Ali Məhkəməsi Plenumunun 2020-ci il 19 mart tarixli Qərarı qüvvədən düşmüş hesab edilib, hazırkı Plenum qərarının 2020-ci il 23 aprel tarixdən 4 may 2020-ci il tarixədək qüvvədə olması təsbit edilib.
Plenumda, həmçinin konkret işlərə baxılıb.
Bölmənin digər xəbərləri
