Alissa Bankovska: Bərpa prosesi yenidən tikilmiş binaların sayı ilə ölçülməməlidir
Bakı, 21 may, AZƏRTAC
Bərpa prosesi yenidən tikilmiş binaların sayı ilə ölçülməməlidir.
AZƏRTAC xəbər verir ki, bu fikri Ukraynanın FIABCI (Beynəlxalq Daşınmaz Əmlak Federasiyası) nümayəndəsi Alissa Bankovska Ümumdünya Şəhərsalma Forumunun 13-cü Sessiyası (WUF13) çərçivəsində "Habitat Peşəkarları Forumu fəlakətdən sonra transformativ bərpa üçün yeni qlobal çərçivəni təqdim edir" mövzusunda brifinqdə deyib.
O bildirib ki, Ukrayna bu gün bərpa məsələsini nəzəri şəkildə deyil, real şəraitdə yaşayır. Onun sözlərinə görə, ölkədə hər gün davam edən böhran və müharibə şəraitində bu, daha qabarıq görünür.
Alissa Bankovska qeyd edib ki, Ukraynada həyata keçirilən bərpa prosesi yalnız dağıdılmış ərazilərin yenidən qurulmasına deyil, həm də icmaların, yaşayış məntəqələrinin və yerli iqtisadiyyatların daha dayanıqlı və gələcəyə yönəlmiş şəkildə inkişafına yönəlib.
O vurğulayıb ki, bərpa prosesi gələcək riskləri azaltmalı, icmaları gücləndirməli, yerli iqtisadiyyatı dəstəkləməli və uzunmüddətli dayanıqlılıq yaratmalıdır. “Transformativ bərpa yalnız müxtəlif sektorlar, peşələr və ölkələr arasında əməkdaşlıq vasitəsilə mümkün ola bilər”, - deyə əlavə edib.
Bölmənin digər xəbərləri
