Almaniya iqtisadiyyatı ikinci rübdə 0,3 faiz geriləyib
Berlin, 22 avqust, AZƏRTAC
Almaniya iqtisadiyyatı 2025-ci ilin ikinci rübündə əvvəlki proqnozdan daha çox azalma ilə üzləşib.
AZƏRTAC xəbər verir ki, Federal Statistika İdarəsinin hesabatında ümumi daxili məhsulun əvvəlki rüblə müqayisədə 0,3 faiz azaldığı qeyd olunub. İlkin hesablamalarda isə cəmi 0,1 faizlik daralma gözlənilirdi.
Geriləmənin əsas səbəbi sənaye istehsalının gözləniləndən zəif inkişaf etməsi olub. Dövlət və özəl istehlak artsa da, tikinti, maşın və avtomobil istehsalına qoyulan sərmayələr kəskin şəkildə azalıb.
Xarici ticarətdə də mənfi tendensiya qeydə alınıb. ABŞ-ın qeyri-sabit ticarət siyasəti və avqustun 7-dən qüvvəyə minən 15 faizlik yeni rüsumlar Almaniyanın ixracyönümlü sənayesinə mənfi təsir göstərib. Nəticədə bir çox şirkətlər ABŞ və Çin bazarlarında satışların azalması ilə üzləşib.
Qeyd edək ki, ilin ilk üç ayında Almaniya iqtisadiyyatı 0,3 faizlik artım nümayiş etdirmişdi. Bu göstərici ABŞ-ın əvvəlki gömrük təhdidləri fonunda bəzi şirkətlərin müqavilələri qabağa çəkməsi ilə bağlı olmuşdu.
Qlobal ticarət perspektivlərinin zəifliyi, sifarişlərin azlığı və digər amillərlə əlaqədar ölkə iqtisadiyyatında üçüncü rübdə də artım gözlənilmir. Dövlətin müdafiə və infrastruktur layihələrinə ayırdığı sərmayənin 2026-cı ildən iqtisadiyyata ciddi təsir göstərəcəyi proqnozlaşdırılır. Ən son proqnozlara əsasən, Almaniya iqtisadiyyatı 2025-ci ildə maksimum 0,3 faiz artım əldə edə biləcək.
Elvin Mövsüm
AZƏRTAC-ın xüsusi müxbiri
Berlin
Bölmənin digər xəbərləri
