“ALMANİYADA AZƏRBAYCAN EVİ” FƏALİYYƏTƏ BAŞLAYACAQDIR

30.11.2005 [11:26]
Çap et
A⁺ A^-

AZƏRTAC-ın xüsusi müxbiri xəbər verir ki, noyabrın 28-də Berlində “Almaniyada Azərbaycan evi” Cəmiyyətinin təsis toplantısı keçirilmişdir. Cəmiyyətin yaradılmasının təşəbbüskarları Azərbaycanda üzun müddət yaşamış və sonradan xarici ölkələrə, o cümlədən Almaniyaya mühacirət edən yəhudilər, Bakı ali məktəblərində təhsil alıb vətənə geri dönmüş, lakin Azərbaycanı unutmamış almanlar və Azərbaycan diasporunun nümayəndələridir.

Berlində yaşayan Azərbaycan vətəndaşı Tofiq Qarayev “Almaniyada Azərbaycan evi” Cəmiyyəti idarə heyətinin sədri, Anar Cəfərov müavin seçilmişlər.

Tofiq Qarayev təsis olunan qurumun sırf xeyriyyəçilik fəaliyyəti proqramını təqdim etmiş və açıqlamalar vermişdir. Onun sözlərinə görə, “Almaniyada Azərbaycan evi”nin yaradılmasından məqsəd Azərbaycanda doğulmuş, uzun müddət burada yaşamış, təhsil almış yəhudiləri, almanları və ölkəmizə, xalqımıza dostluq münasibəti bəsləyən digər millətlərin nümayəndələrini öz ətrafında birləşdirərək təşkilatlandırmaq, Azərbaycan həqiqətlərinin Almaniya ictimaiyyətinə çatdırılmasına, xalqımızın mədəni irsinin təbliğinə töhfə verməkdir.

Azərbaycan Respublikasının Almaniyadakı səfiri Pərviz Şahbazov tədbirdə çıxış etmişdir.