ALMANİYADA AZƏRBAYCANIN AVROPADA LOBBİÇİLİYİNİN GÜCLƏNDİRİLMƏSİNƏ HƏSR OLUNMUŞ FORUM KEÇİRİLƏCƏKDİR
AZƏRTAC xəbər verir ki, iyulun 4-dən 11-dək Almaniyanın Frayburq şəhərində Azərbaycanın Avropada lobbiçiliyinin gücləndirilməsinə həsr olunmuş Yay Forumu keçiriləcəkdir. Azərbaycanlı Tələbələrin Avropa Forumunun (ATAF) Strasburq filialının təşkil etdiyi tədbirin əsas məqsədi xarici ölkələrdə, xüsusən də Avropada yaşayan azərbaycanlıları daha sıx birləşdirmək, lobbiçiliyi inkişaf etdirməkdir.
Bir həftə davam edəcək Forum çərçivəsində Azərbaycanın Avropada və dünyada lobbiçiliyinin gücləndirilməsində kütləvi informasiya texnologiyalarından istifadə mövzusunda təlim kursları keçiriləcək, sonda iştirakçılara sertifikatlar veriləcəkdir. Eyni zamanda azərbaycanlı tələbələrin sosial fəaliyyətinin artırılması barədə fikir mübadiləsi aparılacaq, yarışlar, əyləncəli proqramlar təşkil olunacaqdır.
Yay Forumunun iştirakçıları, həmçinin Fransanın və Almaniyanın tarixi və mədəniyyət abidələri ilə tanış olacaqlar.
Tədbirdə iştirak etmək istəyənlər [email protected] elektron ünvanına müraciət edə bilərlər.
Bölmənin digər xəbərləri
