Almaniyada bir ailənin üç üzvünü öldürən şəxsin axtarışlarına xüsusi təyinatlı qüvvələr cəlb olunub
Berlin, 8 aprel, AZƏRTAC
Almaniyanın Reynland-Pfalts əyalətinin Vestervald bölgəsindəki Vaytefeld qəsəbəsində bir ailənin üç üzvünü qətlə yetirməkdə şübhəli bilinən şəxsin axtarışları davam etdirilir.
AZƏRTAC “Bild” qəzetinə istinadla xəbər verir ki, 61 yaşlı şübhəli şəxsin – Aleksandr Maysnerin axtarışlarına xüsusi təyinatlı qüvvələr də cəlb olunub. Polis və təhlükəsizlik qüvvələri şahidlərin və kənd sakinlərinin verdikləri məlumatlar əsasında fasiləsiz axtarış-əməliyyat tədbirləri həyata keçirirlər.
Xatırladaq ki, aprelin 6-da Vaytefeld qəsəbəsində bir evdə üç nəfərin – 47 yaşlı ata, 44 yaşlı ana və onların 16 yaşlı oğullarının cəsədləri tapılıb. Təxminən 2200 nəfərin yaşadığı qəsəbədə baş vermiş bu hadisədən sonra sakinlər arasında qorxu və narahatlıq hökm sürür. İnsanlar A.Maysnerin əvvəllər bir sıra qonşuları ilə problemlər yaşadığı kəndə yenidən qayıdacağından qorxurlar.
Cinayətkarın yaxalanması üçün əraziyə peşəkar xüsusi təyinatlılar və müvafiq texniki vasitələr cəlb edilib. Əməliyyatlara polis helikopterinin cəlb ediləcəyi də ehtimal olunur. Polis şübhəli şəxs barədə operativ məlumat verilməsi üçün “qaynar xətt” yaradıb.
Elvin Mövsüm
AZƏRTAC-ın xüsusi müxbiri
Berlin
Bölmənin digər xəbərləri
