Alparslan İmamqulu: Ermənistan yenə öz saxta oyunlarına davam etməkdədir
Bakı, 27 iyul, AZƏRTAC
Ermənistan Brüssel danışıqlarında Azərbaycanın ərazi bütövlüyünü və suverenliyini tanıyaraq, əslində həm də Azərbaycan ərazilərində mövcud olan terrorçuları tanımış oldu. Bundan sonrakı müddətdə onların yeni cəhdləri və “humanitar yardım” altında təxribatların törədilməsi birmənalı qarşılanmamalıdır.
Bunu AZƏRTAC-a açıqlamasında hərbi analitik, “Türkiyə Universitetləri Məzunları” İctimai Birliyi sədrinin baş müşaviri Alparslan İmamqulu deyib.
Onun sözlərinə görə, indiki vəziyyətdə atılacaq ən doğru addım antiterror əməliyyatı apararaq ərazilərimizdəki bütün terrorçuların təmizlənməsi və qondarma rejimin rəhbərliyində olan liderlərin Azərbaycanın hüquq-mühafizə orqanları tərəfindən tutulmasıdır. Bu, onun üçün lazımdır ki, ölkəmizin ərazilərində mövcud olan erməni əhali Azərbaycan vətəndaşlığını qəbul edə bilsinlər. Çünki 2025-ci ilədək həm “Böyük Qayıdış” planı çərçivəsində düşməndən azad olunmuş ərazilərə bir sıra vətəndaşlarımız qayıdacaq. Bu, onların təhlükəsizliyinin təmin edilməsi üçün vacibdir. Həmçinin Azərbaycan ərazilərində yaşayan erməni əhali qarşısında şərtlər qoymaq lazımdır ki, ya vətəndaşlığımızı qəbul edin, ya da torpaqlarımızı tərk edin. Amma buna qədər həmin qeyri-qanuni erməni silahlı dəstələrinin təmizlənməsi də bir o qədər əhəmiyyətlidir.
“Son günlərdə Laçın yolu istiqamətində hərəkət edən müxtəlif nəqliyyat vasitələrinin toplanmasına gəldikdə isə gömrük prosedur qaydalarına görə onlardan mütləq şəkildə gərəkli rüsumlar tələb edilməlidir. Ümumiyyətlə, hesab edirəm ki, baş verən proseslərin gedişi müsbət yöndədir. Baxmayaraq ki, Ermənistan yenə öz saxta oyunlarına davam etməkdədir. Düşünürəm ki, tez zamanda ərazi bütövlüyümüz və təhlükəsizliyimiz üçün lazım olan adekvat addımlar atılacaq”, - deyə A.İmamqulu bildirib.
Qeyd edək ki, Azərbaycan Respublikasının Dövlət Sərhəd Xidməti iyulun 25-də “Laçın” dövlət sərhədindən buraxılış məntəqəsinin qarşı tərəfdən olan girişində Ermənistan tərəfindən müxtəlif nəqliyyat vasitələrinin toplanmasını təşkil etməklə nümayişkaranə şəkildə növbəti təxribat əməli planlaşdırıldığı barədə məlumat yaymışdı. Azərbaycan tərəfi Ermənistanı təxribat xarakteri daşıyan və vəziyyətin gərginləşməsinə xidmət edən əməllərdən çəkinməyə çağırmışdı. Baş verə biləcək hər hansı hadisəyə görə məhz rəsmi İrəvanın məsuliyyət daşıyacağını bildirmişdi. Edilən xəbərdarlıqlara baxmayaraq, iyulun 26-da Ermənistan tərəfindən nəqliyyat vasitələrinin “Laçın” dövlət sərhədindən buraxılış məntəqəsində cəmləşdirilməsi həyata keçirilib. Bu, Ermənistan tərəfinin siyasi şousu, manipulyasiyadır və növbəti təxribat cəhdidir.
Bölmənin digər xəbərləri
