“Amazon”un “Kuiper” internet peyklərinin ilk partiyasının buraxılışı uğursuz olub
Bakı, 11 aprel, AZƏRTAC
27 “Amazon Project Kuiper” genişzolaqlı internet peyklərini daşıyan “United Launch Alliance” şirkətinin Atlas V raket daşıyıcısının buraxılışı əlverişsiz hava şəraiti səbəbindən təxirə salınıb.
AZƏRTAC CNBC telekanalına istinadla xəbər verir ki, buraxılışın Florida ştatındakı Kanaveral kosmodromunda keçirilməsi planlaşdırılırdı.
Altı il əvvəl “Amazon” Yerin aşağı orbitində - Yer səthindən 2 min kilometr məsafədə internet peyklərindən ibarət öz qruplaşmasını yaratmaq planlarını təqdim etdi. Şirkət müxtəlif ölkələrin istifadəçilərinə, biznes və dövlət qurumlarına xüsusi terminallar vasitəsilə qoşulma təklif etməklə aşağı gecikmə ilə genişzolaqlı internetə çıxış xidməti göstərmək niyyətindədir. Mövcud məlumata görə, şirkət bu ilin sonunda kommersiya xidmətləri göstərməyə başlamağı planlaşdırır.
“Amazon”, “Starlink” şəbəkəsinin operatoru olan, İlon Maskın “SpaceX” şirkəti ilə rəqabət aparmağa ümid edir. Hazırda “Starlink” peyk interneti bazarda lider mövqe tutur, şirkətin orbital qruplaşmasında isə 8 minə yaxın peyk var. Maskın özü ABŞ Prezidenti Donald Trampın əsas müttəfiqlərindən biridir, bu da, “Starlink”in federal hökumətdəki mövcudluğunu genişləndirməyə kömək edib.
“Amazon”a gəlincə, şirkət ABŞ Federal Rabitə Komissiyasının müəyyən etdiyi müddətlərə sığmır. Tənzimləyici 2026-cı ilin iyul ayına qədər şirkətin planlaşdırılan peyklərin ümumi sayının ən azı yarısını, yəni 1618 apparatı orbitə çıxaracağını gözləyir. İlk buraxılışdan sonra “Amazon” kosmosa peyklərin buraxılması sürətini artırmaq niyyətindədir.
Bölmənin digər xəbərləri
