AMEA-nın Neft-Kimya Prosesləri İnstitutunda koronavirusla bağlı profilaktik tədbirlər həyata keçirilir
Bakı, 16 mart, AZƏRTAC
Azərbaycan Milli Elmlər Akademiyasının (AMEA) prezidenti, akademik Ramiz Mehdiyevin müvafiq sərəncamına uyğun olaraq AMEA-nın akademik Yusif Məmmədəliyev adına Neft-Kimya Prosesləri İnstitutunda tədbirlər planı haqqında əmr imzalanıb, icraya məsul şəxslərə tapşırıqlar verilib.
İnstitutdan AZƏRTAC-a bildirilib ki, elmi müəssisənin iş otaqları, laboratoriyaları, yeməkxanası, iclas salonları, dəhlizlər və binanın həyəti dezinfeksiya olunub.
Həmçinin institutun laboratoriyasında hazırlanmış, tam zərərsiz, yüz faiz biomənşəli antimikrob təsirli məhlul sprey qablarına doldurularaq elmi müəssisənin bütün otaqlarında qapıların tutacaqlarını dezinfeksiya etmək üçün paylanılıb. Qapıların tutacaqlarının ilkin dezinfeksiyası həyata keçirilib. Gün ərzində üç dəfə dezinfeksiya işlərinin aparılması tapşırılıb.
İnstitutun tibb otağı gücləndirilmiş iş rejiminə keçib. Həmçinin instituta kənar şəxslərin daxil olması tam məhdudlaşdırılıb.
Bölmənin digər xəbərləri
