BDU-da professor Misir Mərdanovun 80 illik yubileyi qeyd olunub
Bakı, 14 oktyabr, AZƏRTAC
Bakı Dövlət Universitetində (BDU) Mexanika-riyaziyyat fakültəsinin Ali riyaziyyat və riyaziyyatın tədrisi metodikası kafedrasının müdiri AMEA-nın müxbir üzvü, Əməkdar elm xadimi, fizika-riyaziyyat elmləri doktoru, professor Misir Mərdanovun 80 illik yubileyi qeyd olunub.
Universitetdən AZƏRTAC-a bildirilib ki, əvvəlcə professor Misir Mərdanovun həyat və fəaliyyətinə həsr olunmuş videoçarx nümayiş etdirilib. Tədbirdə çıxış edən BDU-nun rektoru Elçin Babayev professor Misir Mərdanovu yubileyi münasibətilə təbrik edib, universitetin tarixinin onun yetirmələri olan görkəmli alimlərin fəaliyyəti ilə sıx bağlı olduğunu vurğulayıb.
Rektor qeyd edib ki, Misir Mərdanovun fəaliyyəti elm, müəllimlik və təhsil idarəçiliyi kimi bir-biri ilə sıx bağlı olan sahələri əhatə edir. BDU-da təhsil alıb, burada müəllim və alim kimi çalışıb, sonralar universitetə rəhbərlik edib, daha sonra uzun illər ölkənin təhsil sistemində məsul vəzifə tutub. Misir Mərdanovun elmi və pedaqoji fəaliyyəti bir-birini tamamlayıb. Görkəmli alimin tədqiqatları riyaziyyatın mürəkkəb sahələrindən olan optimal idarəetmənin riyazi üsulları və variasiya hesabı ilə bağlıdır. Bu istiqamətdə apardığı araşdırmalar, elmi əsərləri və uzunmüddətli pedaqoji fəaliyyəti onun alim kimi keçdiyi yolun mühüm hissəsini təşkil edir.
Elçin Babayev uzunmüddətli səmərəli elmi və elmi-pedaqoji fəaliyyətinə, riyaziyyat elminin inkişafına, yüksəkixtisaslı kadrların hazırlanmasına verdiyi töhfələrə və BDU-nun ictimai həyatında fəal iştirakına görə, həmçinin 80 illik yubileyi münasibətilə professor Misir Mərdanova fəxri fərman təqdim edib.
AMEA-nın prezidenti akademik İsa Həbibbəyli çıxışında professor Misir Mərdanovun Azərbaycanın elm və təhsil tarixində özünəməxsus iz qoymuş görkəmli xadimlərdən biri olduğunu bildirib. O, alimin uzun illər dövlətin təhsil və elm siyasətinin həyata keçirilməsinə sədaqətlə xidmət etdiyini, dövlətçilik fəaliyyətinin elmi və pedaqoji fəaliyyəti ilə üzvi vəhdət təşkil etdiyini vurğulayıb.
BDU-nun Mexanika-riyaziyyat fakültəsinin dekanı Ziyatxan Əliyev professor Misir Mərdanovun həyat və fəaliyyəti, elmi-pedaqoji və ictimai fəaliyyəti, dərslik yaradıcılığı, eləcə də təhsil sisteminin inkişafına verdiyi töhfələr barədə məruzə ilə çıxış edib. Qeyd olunub ki, alim 21 dərsliyin, 4 monoqrafiyanın, təhsil sahəsinə dair 25 kitabın və 100-dən çox elmi məqalənin müəllifidir.
Tədbirdə Milli Məclisin Səhiyyə komitəsinin sədri, Azərbaycan Tibb Universitetinin Onkologiya kafedrasının müdiri akademik Əhliman Əmiraslanov, ictimai-siyasi xadim, tarix elmləri doktoru Həsən Həsənov, Qərbi Azərbaycan İcması İdarə Heyətinin sədri, Milli Məclisin deputatı Əziz Ələkbərli, BDU-nun Ümumi dilçilik kafedrasının müdiri akademik Nizami Cəfərov, universitetin Optika və molekulyar fizika kafedrasının məsləhətçi professoru Niftalı Qocayev və Milli mətbuat tarixi kafedrasının müdiri Cahangir Məmmədli çıxış ediblər. Çıxışlarda Misir Mərdanovun Azərbaycan riyaziyyat elminin inkişafında, yüksəkixtisaslı kadrların hazırlanmasında, elmi-pedaqoji fəaliyyətin təşkilində və ictimai-siyasi həyatda xidmətləri vurğulanıb. Onun BDU-nun rektoru və Azərbaycanın təhsil naziri vəzifələrində çalışdığı dövrdəki fəaliyyəti yüksək qiymətləndirilib.
Sonda professor Misir Mərdanov çıxış edərək ömrünün 62 ilini BDU-ya həsr etdiyini deyib, bundan sonra da ölkədə elm və təhsilin, eləcə də doğma universitetinin inkişafı üçün əlindən gələni əsirgəməyəcəyini vurğulayıb.
Bölmənin digər xəbərləri
