İDMAN
Amerika kuboku: Argentina Paraqvayla bacarmayıb, Kolumbiya qələbə qazanıb
Bakı, 20 iyun, AZƏRTAC
İyunun 20-də futbol üzrə Amerika kubokunda növbəti oyunlar keçirilib.
AZƏRTAC xəbər verir ki, “B” qrupunda yer alan Argentina milli komandası Paraqvay seçməsi ilə qarşılaşıb. Görüş 1:1 hesabı ilə başa çatıb. Bununla da Argentina qrupda ikinci oyununda da xal itirib.
Qrupun digər oyununda Kolumbiya və Qətər milliləri üz-üzə gəlib. Matç Kolumbiyanın minimal hesablı qələbəsi ilə yekunlaşıb - 1:0. Oyunda yeganə qolu 85-ci dəqiqədə Duvan Zapata Qətər millisinin qapısından keçirib.
Beləliklə, iki oyundan sonra Kolumbiya millisi 6 xalla qrupa başçılıq edir. Paraqvay 2 xalla ikinci pillədə qərarlaşıb. Hesabında 1 xal olan Argentina isə qrup sonuncusudur.