ANDREY ŞERYAKOV AZƏRBAYCANDA OYNAYACAQ
Bakı, 31 avqust (AZƏRTAC). Belarusun Jodino şəhərinin “Torpedo” komandasının hücumçusu və ən yaxşı bombardiri Andrey Şeryakov Azərbaycanın yüksək liqada çıxış edən “Simurq” (Zaqatala) klubu ilə müqavilə bağlamışdır. Avqustun 29-da futbolçu özünün yeni iş yerinə yola düşmüşdür.
Səfər ərəfəsində “Torpedo” komandasının rəsmi saytına müsahibə vermiş Şeryakov demişdir: “Bu illər ərzində mənə inananların, məni dəstəkləyənlərin hamısına minnətdarlığımı bildirmək istəyirəm. Hesab edirəm ki, karyeramın məhz Jodino dövrü ən məhsuldar olmuşdur. “Torpedo” komandasında oynadığım dövrdə mən özümü hücumçu kimi göstərməyə tam müvəffəq olmuşam. Jodinolu azarkeşlərə xüsusi təşəkkür etmək istəyirəm. Onlar komandanı həm öz meydanında, həm də digər stadionlarda dəstəkləyirdilər. Yadda saxlayın ki, çətin görüşlərdə oyunçuları dəstəkləmək onlar üçün xüsusilə vacibdir”.
Onu da əlavə edək ki, ötən mövsümdə ilk dəfə ölkə çempionatının mükafatçısı (üçüncü yer) olmuş “Simurq” Avropa liqasında iştirak etmiş, lakin ilk qarşılaşmada İsrailin “Bney-İequda” komandasına uduzmuşdur.
Bölmənin digər xəbərləri
