ANKARADAKI AZƏRBAYCAN GECƏSİ ÇƏRÇİVƏSİNDƏ AÇILAN “AZƏRBAYCAN GUŞƏSİ” FƏALİYYƏTİNİ DAHA İKİ GÜN DAVAM ETDİRƏCƏKDİR
Bakı, 31 avqust (AZƏRTAC). Ankaranın Keçiörən rayonunda Mərkəzi Asiya, Afrika və Asiyanın müsəlman ölkələrinin iştirak etdiyi “Sərhədləri aşan qardaşlıq” şüarı altında təşkil edilən II Beynəlxalq Ramazan festivalının keçirildiyi məkanda açılan Azərbaycan guşəsi daha iki gün - sentyabrın 1-də və 2-də fəaliyyətini davam etdirəcəkdir. Diasporla İş üzrə Dövlət Komitəsindən AZƏRTAC-a bildirmişlər ki, əvvəlcə guşənin avqustun 26-dan 31-dək fəaliyyət göstərəcəyi planlaşdırılsa da, həm bələdiyyə rəhbərliyinin, həm də tədbir iştiakçılarının böyük marağını, eləcə də guşədə Azərbaycan haqqında ətraflı bilgi toplamağa gələnlərin sayının çoxluğunu nəzərə alan Türkiyə-Azərbaycan Dərnəyi (TAD) tədbirin daha iki gün davam etdirilməsi barədə qərar qəbul etmişdir.
TAD-ın Azərbaycanın Türkiyədəki səfirliyi ilə birlikdə təşkil etdiyi guşədə Ankara sakinlərinə Azərbaycan haqqında ətraflı məlumat verilmiş, kitablar, broşürlər, CD-lər paylanmışdır. Qonaqlar Azərbaycanın siyasi, iqtisadi və sosial sahədə nailiyyətlərindən bəhs edən filmə də tamaşa etmişlər. Ankarada yeni yaradılan TAD-ın ilk böyük tədbiri olan Azərbaycan gecəsi və Azərbaycan guşəsinin açılmasını Türkiyənin digər şəhərlərində yaşayan soydaşlarımız təqdir etmişlər və təşkilatın sədri Sinan Oğandan bu cür tədbirləri başqa bölgələrdə də keçirilməsini xahiş etmişlər.
Qeyd edək ki, Azərbaycan guşəsinin açılışında cıxış edən Keçiörən bələdiyyəsinin başçısı Mustafa Ak rəhbərlik etdiyi yerli özünüidarə qurumunun Azərbaycandakı analoji strukturlarla əlaqəsi olduğunu bildirmiş və demişdir ki, “Azərbaycanda qardaş bələdiyyələrimiz vardır”. O xüsusilə qeyd etmişdir ki, Keçiörən bələdiyyəsinin ərazisində Xocalı soyqırımı qurbanlarının xatirəsinə abidə tikilmişdir və abidənin üzərində Azərbaycan bayrağı dalğalanır.
Ankarada da belə bir abidənin olmasının əhəmiyyətini vurğulayan TAD sədri Sinan Oğan demişdir ki, Turkiyədəki azərbaycanlılar Keçiörən bələdiyyəsinin ərazisində ölkəmizlə bağlı yeni parkların açılmasını da gözləyirlər. Sinan Oğan bələdiyyə başçısına Azərbaycan gecəsinin keçirilməsi və Azərbaycan gusənin açılmasına yer ayırdığı üçün təşəkkür etmişdir. Azərbaycanın Türkiyədəki səfirliyinin müşaviri Rəşad Vahabzadə, Türkiyə-Azərbaycan Dərnəyinin sədri Sinan Oğan, Diasporla İş üzrə Dövlət Komitəsinin təmsilçisi Elnar Məmmədov və başqaları çıxış etmiş və təkliflərini bildirmişlər.
E.Məmmədov DİDK-nın Türkiyə ilə, o cümlədən Keçiörən bələdiyyəsi ilə müxtəlif sahələrdə əməkdaşlığa hazır olduğunu xüsusi qeyd etmişdir.
######
Bölmənin digər xəbərləri
