“Araz-Naxçıvan” almaniyalı hücumçunu transfer edib
Bakı, 17 iyun, AZƏRTAC
“Araz-Naxçıvan” komandası heyətinə daha bir futbolçu cəlb edib.
Klubdan AZƏRTAC-a verilən məlumata görə, Muxtar Respublika təmsilçisi Ba-Muaka Simakala ilə 1 illik müqavilə imzalayıb.
28 yaşlı hücumçu artıq Bakıdadır. Sağ və sol cinah yarımmüdafiəçisi kimi də çıxış edə bilən Simakala müxtəlif illərdə vətəni Almaniyada “Borussiya Münhenqladbax”, “Elfersberq”, “Redinqhauzen”, “Kayzerslautern”, “Xolştayn Kil”, Niderlandın “Roda” klublarında forma geyinib. O, son mövsümü Almaniyanın III Bundesliqa təmsilçisi olan “Osnabrük” komandasında keçirib. Hücumçu 2014-cü ildə Almaniyanın U-18 millisində də yer alıb.
Qeyd edək ki, buna qədər baş məşqçi Elmar Baxşıyevlə yanaşı, İssof Paro, Ömər Buludov, Kristian Avram, Tərlan Əhmədli, Ürfan Abbasov, Slavik Alxasov, Qara Qarayev, Bəxtiyar Həsənalızadə, Ülvü İsgəndərov, Vanderson Melo, Ramon Maçado və Nuno Rodrigueslə başa çatan müqaviləni yeniləyən, Bar Coheni transfer edən “Araz-Naxçıvan” Vadim Abdullayevlə yollarını ayırıb.
Bölmənin digər xəbərləri
