ARDNŞ-İN TƏŞƏBBÜSÜ İLƏ ƏTRAF MÜHİTİN MÜHAFİZƏSİNƏ DAİR NÖVBƏTİ SEMİNAR KEÇİRİLMİŞDİR

13.05.2010 [10:20]
Çap et
A⁺ A^-

Bakı, 13 may (AZƏRTAC). Mayın 11-də Azərbaycan Respublikası Dövlət Neft Şirkətinin (ARDNŞ) təşəbbüsü ilə “Park İnn-Azərbaycan” mehmanxanasında Norveçin “StatoilHydro” şirkəti tərəfindən ARDNŞ-in struktur bölmələri, birgə müəssisələri və əməliyyat şirkətlərinin ekologiya sahəsində çalışan 51 əməkdaşı üçün ətraf mühitin mühafizəsinə dair beşinci seminar keçirilmişdir.

ARDNŞ-in mətbuat xidmətindən verilən məlumata görə, tədbirdə seminarların daimi aparıcısı Terye Hoyland proqram barədə məlumat vermiş və məruzəçiləri iştirakçılara təqdim etmişdir.

“Tullantıların idarə edilməsi” və “Lay sularının utilizasiyası” mövzularına həsr olunmuş seminarda norveçli mütəxəssislər Hovard Solheym Nateland, Lars-Martin Bö və Sesil Fenne Villumsen tərəfindən edilən məruzələri dinləyicilər maraqla qarşılamışlar. Seminarda ekoloji problemlər, onların aradan qaldırılması yolları haqqında geniş fikir mübadiləsi aparılmışdır.

Sonda növbəti seminarlar üçün mövzuların müəyyənləşdirilməsi məqsədi ilə iştirakçıların təklifləri dinlənilmişdir.