Aşqarlar Kimyası İnstitutunun elmi fəaliyyətinin perspektiv planları müzakirə olunub
Bakı, 3 sentyabr, AZƏRTAC
AMEA-nın akademik Ə.Quliyev adına Aşqarlar Kimyası İnstitutunun Elmi şurasının növbəti iclası keçirilib.
İnstitutdan AZƏRTAC-a bildirilib ki, iclasda pandemiya şəraitində elmi müəssisənin fəaliyyətinin perspektiv planları müzakirə olunub. İnstitutun direktoru, akademik Vaqif Fərzəliyev məlumat verib ki, pandemiya ilə əlaqədar xüsusi karantin rejimində əməkdaşlar öz fəaliyyətlərini Nazirlər Kabineti yanında Operativ Qərargahın tələblərini gözləməklə həyata keçirirlər.
Akademik qeyd edib ki, AMEA-nın, o cümlədən elmi-tədqiqat institutlarının 2020-2025-ci illər üzrə inkişaf konsepsiyası var: “Bu sənəddə konkret hədəflər var. O hədəflərə çatmaq üçün elmi-tədqiqat institutu olaraq daha çox çalışıb, akademik elmə, ümumilikdə ölkəmizin iqtisadiyyatına, cəmiyyətə töhfə verməliyik. İnstitutda yerinə yetirilən tədqiqatların səviyyəsini təmin etmək üçün ilk növbədə elmi işçilərin məsuliyyətini artırmaq lazımdır. Laboratoriya rəhbərləri hər bir əməkdaşın fərdi iş planı üzrə tapşırılan işin vaxtında və keyfiyyətlə yerinə yetirilməsinə nəzarət etməlidir. Elmi işçilər, laborantlar və texniklərin çalışdığı laboratoriya qarşısında yerinə yetirdiyi gündəlik işlər olmalıdır. Onların bilik və bacarıqlarının artırılmasına diqqət yetirilməlidir ki, müstəqil şəkildə elmi tədqiqatla məşğul ola bilsinlər”.
İnstitut direktoru bildirib ki, əməkdaşların elmi fəaliyyətinin qiymətləndirilməsi aparılıb: “Laboratoriyaların 2015-2019-cu illər üzrə 5 illik, həm də elmi işçilərin fərdi şəkildə fəaliyyəti qiymətləndirilib, reytinq siyahısı müəyyənləşdirilib. Laboratoriyaların akkreditasiyası, işçilərin attestasiyası zamanı reytinq siyahısı əsas götürüləcək. Bu proses 2020-ci il üçün də keçiriləcək. Bunları nəzərə alaraq institutun əməkdaşları dünya elminə inteqrasiya etməli, nüfuzlu jurnallarda məqalə dərcinə, beynəlxalq konfranslarda məruzələrə çıxış etməyə, elmmetrik göstəricilərini yaxşılaşdırmağa çalışmalıdırlar”.
Akademik Vaqif Fərzəliyev diqqətə çatdırıb ki, dünya elminin müasir çağırışları və ölkə iqtisadiyyatının mövcud tələbləri nəzərə alınmaqla fundamental nəzəri və tətbiqi elmi tədqiqatlar aparan, yüksəkixtisaslı kadr hazırlığı həyata keçirən elmi müəssisə kimi lazım olarsa, struktur və onların fəaliyyət sahələri yenidən nəzərdən keçiriləcək. Müvafiq optimallaşdırılma və təkmilləşdirilmə aparılacaq.
İclasda elmi işlər üzrə direktor müavini, kimya elmləri doktoru, dosent Əfsun Sucayev, elmi katib, kimya üzrə fəlsəfə doktoru Mehparə Səfərova, ümumi işlər üzrə direktor müavini Elman Zülfüqarov, kadrlar şöbəsinin müdiri Rəfiqə Məmmədova, institutun Həmkarlar Təşkilatının sədri Elxan İsakov, baş elmi işçilər, kimya elmləri doktorları Elmira Nağıyeva, Sabirə Sərdarova və digərləri gündəlikdə duran məsələlərlə bağlı rəy və təkliflərini veriblər.
Bölmənin digər xəbərləri
