ATU-da Ümummilli Lider Heydər Əliyevə həsr olunan beynəlxalq elmi-praktik konfrans keçirilib
Gəncə, 15 may, Elcan Məmmədov, AZƏRTAC
Azərbaycan Texnologiya Universitetində (ATU) Ümummilli Lider Heydər Əliyevin anadan olmasının 102 illiyinə həsr edilən “Dördüncü sənaye inqilabı dövründə elm və texnologiyaların mövcud vəziyyəti və inkişaf perspektivləri” mövzusunda beynəlxalq elmi-praktik konfrans keçirilib.
AZƏRTAC-ın bölgə müxbiri xəbər verir ki, tədbirdən əvvəl konfrans iştirakçıları Ulu Öndər Heydər Əliyevin abidəsini ziyarət edib, önünə gül dəstələri düzüblər.
Tədbir Dövlət Himninin səsləndirilməsi, Ümummilli Lider Heydər Əliyevin və şəhidlərin əziz xatirəsinin bir dəqiqəlik sükutla yad edilməsi ilə başlayıb.
Konfransda çıxış edən ATU-nun rektoru Yaşar Ömərov bildirib ki, Texnologiya Universitetinin əsası Ümummilli Lider Heydər Əliyevin təşəbbüsü ilə 1970-ci ilin məhz may ayında qoyulub və bu tarixi qərardan 55 il ötür. Rektor qeyd edib ki, Ulu Öndər Heydər Əliyevin Azərbaycan elminə göstərdiyi diqqət və qayğı, ümumiyyətlə bu istiqamətdə dövlət siyasəti Prezident İlham Əliyev tərəfindən uğurla davam etdirilir.
Gəncə Şəhər İcra Hakimiyyəti başçısının müavini Adil Tağıyev, Milli Məclisin deputatı Pərvin Kərimzadə, İsrailin Holon Texnologiya İnstitutunun rektoru Eduard Yakupov, “Azerfon” (NAR) MMC-nin baş icraçı direktoru Qunnar Panke və “Aspi-Aqro” MMC-nin icraçı direktoru Cahangir Şəfizadə çıxışlarında konfransın işinə uğurlar arzulayıblar.
Plenar iclas çərçivəsində İqtisadiyyat Nazirliyinin tabeliyində Dördüncü Sənaye İnqilabının Təhlili və Koordinasiya Mərkəzinin Təhlil və Monitorinq şöbəsinin rəhbəri Əzizə Vidadinin, Azərbaycan Dövlət İqtisad Universitetinin Elm və innovasiya məsələləri üzrə prorektoru Rövnəq Rzayevin, Azərbaycan Texnologiya Universitetinin Magistratura və doktorantura şöbəsinin müdiri, Qida mühəndisliyi və ekspertiza kafedrasının dosenti Eldəniz Bayramovun və Azərbaycan Texnologiya Universitetinin Ətraf mühitin mühafizəsi kafedrasının doktorantı Elnur Arifzadənin elmi məruzələri dinlənilib. Daha sonra iki günlük konfrans işini 11 istiqamət üzrə bölmələrdə davam etdirib.
Qeyd edək ki, tədbir 21 ölkə, 53 universitet, 10 tədqiqat institutu və bir sıra dövlət və özəl müəssisələrinin iştirakı ilə reallaşıb. Konfransın məcmuələr toplusuna 648 tezis qəbul olunub.
Bölmənin digər xəbərləri
