“AVRASİYA XXI ƏSRDƏ: MƏDƏNİYYƏTLƏRİN DİALOQU VƏ YA SİVİLİZASİYALARIN MÜNAQİŞƏSİ” ADLI FORUM KEÇİRİLMİŞDİR

14.06.2004 [12:00]
Çap et
A⁺ A^-

AZƏRTAC-ın xüsusi müxbiri xəbər verir ki, Qırğızıstanın Çolpon-Ata şəhərində YUNESKO-nun himayəsi ilə “Avrasiya XXI əsrdə: mədəniyyətlərin dialoqu və ya sivilizasiyaların münaqişəsi” adlı beynəlxalq forum keçirilmişdir.

Forumda MDB ölkələrinin, Türkiyə, ABŞ, İran, Hindistan, Pakistanın, eləcə də nüfuzlu beynəlxalq təşkilatların nümayəndələri iştirak etmişlər.

Tədbirin açılışında Qırğızıstan prezidenti Əsgər Akayev, Tacikistan prezidenti Emoməli Rəhmanov, YUNESKO-nun baş direktoru Koiçiro Matsuuranın çıxışları maraqla qarşılanmışdır.

Forumda terrorizmə qarşı mübarizə, təhlükəsizlik məsələləri, beynəlxalq ticarətin və turizmin inkişaf etdirilməsi, yeni nəqliyyat dəhlizlərinin yaradılması, ekoloji problemlərin həlli, dünya ölkələrində yoxsulluğun ləğvi və s. müzakirə edilmişdir.

Sonda “Avrasiyada mədəniyyətlər və sivilizasiyalar arasında dialoq” adlı deklarasiya qəbul olunmuşdur.