İDMAN
Avropa çempionatı: Azərbaycanın badminton yığmaları təsnifat mərhələsində mübarizə aparacaqlar
Bakı, 6 dekabr, AZƏRTAC
Dekabrın 7-9-da Abşeron Olimpiya İdman Kompleksində badminton üzrə 2024-cü il Avropa çempionatının təsnifat mərhələsinin görüşləri keçiriləcək.
Azərbaycan Badminton Federasiyasından AZƏRTAC-a verilən məlumata görə, qadınlardan ibarət milli komanda Estoniya, Şotlandiya və Slovakiya yığmaları ilə eyni qrupda mübarizə aparacaq.
Komandanın heyətində Keişa Fatimə Zəhra, Leyla Camalzadə, Aysu Kərimzadə, Era Maftuha və Həcər Nuriyeva yer alıb. Yığma qrupda ilk oyununu Şotlandiya millisinə qarşı keçirəcək. Qrup qalibi final mərhələsinə birbaşa vəsiqə qazanacaq.
Badminton üzrə kişilərdən ibarət Azərbaycan millisi isə Norveç və İrlandiya ilə yarımqrupda yarışacaq. Oyunlar dekabrın 7-10-da baş tutacaq.
Yığmanın heyətində Edi Reski Dviçayo, Muhammad Kadafi, Aqil Qəbilov, Diki Pangestu və Rəvan Niftəliyev çıxış edəcəklər. Komandamız yarımqrupda birinci olacağı təqdirdə, Çexiya, Avstriya və Portuqaliyanın yer aldığı yarımqrupun qalibi ilə qarşılaşacaq. Bu görüşün qalibi 2024-cü il fevralın 14-18-də Polşanın Lodz şəhərində kişi və qadın komandalar arasında keçiriləcək Avropa çempionatına vəsiqə qazanacaq.
Təsnifat mərhələsinin oyunları həm də “Paris-2024” Yay Olimpiya Oyunlarına lisenziya xalları verir.