AVROPA ERMƏNİ SEPARATİZMİNƏ GÖZ YUMUR
Milli Məclisin deputatı Gövhər Baxşəliyeva yığıncaqda çıxış etmişdir. Gövhər xanım yığıncaq barədə AZƏRTAC-ın müxbirinə müsahibə vermişdir. O demişdir:
- Çıxışımın əvvəlində bildirdim ki, ölkəmiz gənc dövlət olmasına baxmayaraq, hər sahədə Avropaya inteqrasiya edir. Azərbaycanda siyasi, hüquqi, iqtisadi, sosial islahatlar müvəffəqiyyətlə həyata keçirilir. Ölkəni yaxın vaxtlarda modernləşdirmək üçün bütün imkanlar səfərbər olunur.
Terrorizmə qarşı mübarizə, silahlara məhdudiyyət qoyulması, Avropada yaxın qonşuluq siyasəti, Azərbaycanın Avropa İttifaqı və NATO ilə əməkdaşlığı, sülh naminə tərəfdaşlıq məsələlərinə toxundum.
Çıxışımın əsas hissəsini isə ölkəmiz üçün ağrılı bir mövzu olan Ermənistan-Azərbaycan, Dağlıq Qarabağ münaqişəsinə həsr etdim. Bildirdim ki, keçmiş Sovetlər Birliyi məkanında hələlik hər hansı təhlükəsizlik tədbirlərindən danışmaq qeyri-real görünə bilər. Çünki, dondurulmuş regional münaqişələr, o cümlədən Cənubi Qafqaz bölgəsində Ermənistan-Azərbaycan, Dağlıq Qarabağ münaqişəsi bu günə kimi həllini tapmamışdır. Torpaqlarımızın 20 faizi hələ də Ermənistanın işğalı altındadır, bir milyondan artıq insan öz doğma yurdlarından didərgin düşmüşdür. Buna baxmayaraq, ölkəmizin məsələni sülh yolu ilə həll etmək istədiyini bildirdim. Eyni zamanda, münaqişənin sadə erməni xalqına da böyük ziyanlar vurduğunu xatırlatdım.
Münaqişənin sülh yolu ilə həlli məsələsində dünyanın nüfuzlu beynəlxalq təşkilatlarının ölkəmizi dəstəklədiyini, BMT Təhlükəsizlik Şurasının münaqişə ilə bağlı dörd qətnaməsində, ATƏT-in Lissabon və İstanbul sammitlərində qəbul olunmuş sənədlərdə Azərbaycanın ərazi bütövlüyünün tanındığını xatırlatdım.
Bütün bunlarla yanaşı, dedim ki, bu mövcud həqiqətləri dərk edən Avropa təəssüf ki, erməni separatçılarının hərəkətlərinə göz yumur.
Çıxışımda beynəlxalq terrorizmin Azərbaycandan da yan keçmədiyini bildirdim. Ermənistanın “ASALA” terror təşkilatının ölkəmizə qarşı dəfələrlə həyata keçirdiyi terror aktları nəticəsində yüzlərlə günahsız insanın həlak olduğunu, Azərbaycanın beynəlxalq terrorizmə qarşı mübarizədə ölkəmizin fəal iştirak etdiyini qeyd etdim.
Sonda münaqişələri həll etmək yolunda dünya ictimaiyyəti tərəfindən xüsusi bir qurumun yaradılmasının vacibliyini vurğuladım və bildirdim ki, bu qurum beynəlxalq qanunlar işləyib hazırlamalı və təcavüzkarları bu qanunlar qarşısında cavab verməyə məcbur etməlidir. Məhz bundan sonra Avropada təhlükəsizlik tədbirlərindən danışmaq olar.
Bölmənin digər xəbərləri
