SİYASƏT
AVROPA İNSAN HÜQUQLARI SEMİNARI BAŞA ÇATMIŞDIR
AZƏRTAC xəbər verir ki, dekabrın 9-da Avropa İnsan Hüquqları Konvensiyasının 55 illiyi münasibətilə Bakıda keçirilən “Avropa insan hüquqları standartlarının milli insan hüquqları təsisatları tərəfindən tətbiqi” mövzusunda ikigünlük seminar başa çatmışdır. Tədbir Azərbaycan Respublikasının İnsan Hüquqları üzrə Müvəkkili Aparatının və Avropa Şurasının təşkilatçılığı ilə keçirilmişdir.
Konstitutsiya Məhkəməsinin, Ali Məhkəmənin, Baş Prokurorluğun, Milli Məclis nümayəndələrinin və beynəlxalq ekspertlərin iştirakı ilə keçirilən yığıncaqda Avropa İnsan Hüquqları Standartlarının həyata keçirilməsində ombudsmanın, hökumətin və milli məhkəmələrin rolundan danışılmış, Avropa İnsan Hüquqları Konvensiyasının dövlət orqanlarının işində tətbiqinin vacibliyi vurğulanmışdır.
Yığıncaqda Azərbaycanda insan hüquqlarının qorunması sahəsində görülmüş işlər barədə məlumat verilmiş, Avropa Sosial Xartiyasının, Avropa İnsan Hüquqları Konvensiyasının və ona əlavə Protokolların həyata keçirilməsində milli məhkəmələrin mühüm rolu diqqətə çatdırılmışdır.
Tədbirdə mövzu üzrə müzakirələr aparılmış, təkliflər verilmişdir.