Avropa Parlamentinin Strasburqdakı 10 ofisi möhürlənib
Bakı, 14 dekabr, AZƏRTAC
Avropa Parlamentinin təhlükəsizlik qüvvələri Qətərdə keçirilən futbol üzrə dünya çempionatı ilə bağlı korrupsiya təhqiqatı çərçivəsində Strasburqdakı 10-a yaxın ofisini möhürləyib.
AZƏRTAC “Politico” qəzetinə istinadla xəbər verir ki, Avropa Parlamentinin italiyalı deputatı Petro Bartolonun köməkçisinin ofisi də möhürlənib və bağlanıb.
Prokurorluğun məlumatına görə, mətbuatın “Qətər-geyt” adlandırdığı işdə futbol üzrə dünya çempionatına hazırlıq ərəfəsində Avropa Parlamentinin qərarlarına təsir edə bilən deputatlar külli miqdarda pul və ya bahalı hədiyyələr almaqda şübhəli bilinir.
Avropa Komissiyasının vitse-prezidenti Marqaritis Şinas böhran başlayandan sonra ilk ictimai çıxışında korrupsiya qalmaqalı ilə bağlı hər hansı əlaqəsini təkzib edib.
Dekabrın 12-də Avropa Parlamentinin sədri Roberta Metsola dünya çempionatı ilə bağlı sabiq sədr müavini Yeva Kaylinin və daha üç nəfərin həbsinə səbəb olan korrupsiya qalmaqalından sonra parlament üzvlərinin digər ölkələrlə və xarici vətəndaşlarla əlaqəsinə nəzarəti gücləndirmək üçün daxili təhqiqatın və islahatların başlayacağını deyib.
Bölmənin digər xəbərləri
