Avropa Parlamentinin üzvü: Mənzil böhranı sosial ədalət və demokratik sabitliyə birbaşa təsir göstərir
Bakı, 20 may, AZƏRTAC
Hamımız bilirik ki, mənzil təminatı dövrümüzün həlledici siyasi, sosial və regional problemlərindən birinə çevrilib. Avropada və hətta qlobal miqyasda artan mənzil xərcləri, spekulyativ təzyiqlər, regional bərabərsizliklər və iqlim dəyişikliyinə qarşı həssaslıq cəmiyyətlərimizə getdikcə daha çox təzyiq göstərir.
AZƏRTAC xəbər verir ki, bunu Avropa Parlamentinin üzvü Markos Ros Sempere Ümumdünya Şəhərsalma Forumunun 13-cü sessiyası (WUF13) çərçivəsində keçirilən “Milli qanunvericilik qlobal mənzil öhdəliklərini real nəticələrə necə çevirə bilər?” mövzusunda parlament üzvlərinin dəyirmi masasında deyib.
O bildirib ki, məhz buna görə də parlamentlərin üzərinə mühüm məsuliyyət düşür. Çünki mənzil məsələsi qeyd olunduğu kimi təkcə bir bazar problemi və ya bəyanat deyil, bu, həm də sosial həmrəylik, regional ədalət və demokratik sabitlik məsələsidir. Uzun illər boyu mənzil məsələsinə əsasən milli, üzv dövlətlərin daxili, yaxud regional və ya yerli bir problem kimi baxılırdı və bu sahədə Avropa səviyyəsində koordinasiya məhdud idi. Lakin hazırda qarşılaşdığımız böhranın miqyası aydın şəkildə göstərdi ki, mənzilə əlçatanlıq artıq iqtisadi rəqabətqabiliyyətliliyinə, sosial inklüzivliyə, regional həmrəyliyə, həmçinin yaşıl keçidə və vətəndaşların Avropa İttifaqı təsisatlarına olan etimadına təsir göstərir. Məhz bu səbəbdən Avropa səviyyəsindəki son addımlar mühüm əhəmiyyət kəsb edir.
Bölmənin digər xəbərləri
